ایم کیوایم نے کراچی میں تجاوزات کیخلاف آپریشن کی حمایت کردی

کراچی:متحدہ قومی موومنٹ پاکستان کے کنوینر ڈاکٹرخالد مقبول صدیقی نے کہا ہے کہ تجاوزات کیخلاف سپریم کورٹ کے فیصلے کے ساتھ کھڑے ہیں، فیصلوں پر عملدرآمد کے طریقہ کار پر سوال اٹھ رہے ہیں۔

ایم کیوایم کے رہنماء نے کہا ہے کہ سپریم کورٹ نے کراچی سے تجاوزات خاتمے کا حکم دیا، تجاوزات کیخلاف سپریم کورٹ کے فیصلے کے ساتھ کھڑے ہیں،فیصلوں پر عملدرآمد کے طریقہ کار پر سوال اٹھ رہے ہیں،غریب لوگوں کو جعلی دستاویزات دے کر دھوکا کیا گیا۔

20سال کے دوران منصوبے کے تحت تجاوزات قائم کی گئیں، سندھ سیکریٹریٹ سندھی سیکریٹریٹ نہیں ہونا چاہئے، جعلی مردم شماری، جعلی ڈگریوں کے ذریعے انکروچمنٹ ہورہی ہے، کراچی والوں کو دیوار سے لگایا نہیں، چن دیا گیا، کراچی میں تجاوزات کچھ فطری عمل بھی ہے۔

مزید پڑھیں:سپریم کورٹ کے تعمیرات گرانے کے احکامات، متاثرین کہاں جائیں ؟

خالد مقبول صدیقی نے کہا کہ تجاوزات کیخلاف آپریشن میں انصاف کے تقاضے پورے نہیں ہو رہے، ہم بھی تجاوزات ختم کرنے کے حامی ہیں، کراچی مردم شماری میں ڈنڈی نہیں، ڈنڈا مارا گیا۔

واضح رہے کہ دو روز قبل سپریم کورٹ نے سندھ میں تمام سرکاری اراضی واگزار کرانے کا حکم دیتے ہوئے 3ماہ کے اندر زمینوں کا ریکارڈ کمپیوٹرائزڈ کرانے کی بھی ہدایت ہے۔سپریم کورٹ کا کہنا ہے کہ آدھا کراچی سروے نمبر پر چل رہا ہے۔

سرکاری زمینوں پر قبضے بادشاہوں کی طرح ہو رہے ہیں، یونیورسٹی روڈ پر جائیں اور دیکھ لیں کتنی عمارتیں بنی ہیں، نمائشی اقدام کے لیے دیوار گراتے ہیں پھر اگلے دن تعمیر ہو جاتی ہے،کراچی کے خلاف بہت بڑی سازش ہوئی، شہر تباہ کردیا گیا۔