تحریکِ عدم اعتماد، ایم کیو ایم اپوزیشن کا ساتھ دینے کو تیار، مطالبات پیش

اسلام آباد: وزیر اعظم عمران خان کے خلاف تحریکِ عدم اعتماد کا مطالبہ زور پکڑ گیا، اتحادی سیاسی جماعت متحدہ قومی موومنٹ (پاکستان) نے اپوزیشن کا ساتھ دینے کیلئے اپنے مطالبات پیش کردئیے ہیں۔ ایم کیو ایم رہنماؤں کا کہنا ہے کہ ہمارے آپشن کھلے ہیں۔

تفصیلات کے مطابق ایم کیو ایم نے اپوزیشن کا ساتھ دینے شہری سندھ کیلئے ملازمتوں میں 40 فیصد کوٹہ رکھنے سمیت دیگر مطالبات پیش کردئیے جن کی منظوری کی صورت میں ہی متحدہ قومی موومنٹ (پاکستان) اپوزیشن سے ہاتھ ملائے گی۔

یہ بھی پڑھیں:

دورۂ کراچی، وزیر اعظم کی ایم کیو ایم پاکستان کے عارضی مرکز بہادر آباد آمد

متحدہ قومی موومنٹ (پاکستان) کے رہنماؤں نے بااختیار بلدیاتی نظام اور صوبائی مالیاتی کمیشن یقینی بنانے پر اپوزیشن سے تحریری ضمانت مانگ لی۔ متحدہ رہنماؤں نے مطالبہ کیا کہ چوہدری برادران، شہباز شریف اور مولانا فضل الرحمان ضامن بنیں۔

دوسری جانب حکومت ایم کیو ایم سمیت دیگر اتحادی سیاسی جماعتوں کو منانے کی کوششوں میں مصروف ہے۔ وزیرِ اطلاعات فواد چوہدری نے چوہدری برادران سے ملاقات کی جبکہ وزیر اعظم دورۂ کراچی کے دوران خود بہادر آباد پہنچ گئے۔ 

خیال رہے کہ اس سے قبل وزیر اعظم عمران خان ایک روزہ دورۂ کراچی کے دوران ایم کیو ایم (پاکستان) کے عارضی مرکز بہادر آباد پہنچے جہاں ایم کیو ایم رہنماؤں سے ملاقات ہوئی اور تحریکِ عدم اعتماد سمیت ملک کی سیاسی صورتحال پر تبادلۂ خیال کیا گیا۔

آج سے 3روز قبل وزیر اعظم عمران خان کے ہمراہ اعلیٰ سطحی وفد میں گورنر سندھ عمران اسماعیل، وفاقی وزراء علی زیدی، اسد عمر اور دیگر بھی ایم کیو ایم کے عارضی مرکز بہادر آباد پہنچے جہاں متحدہ کی قیادت اور پی ٹی آئی اراکین نے استقبال کیا۔