ایم کیو ایم کا حکومت سے کراچی اور حیدر آباد کو آفت زدہ قرار دینے کا مطالبہ

اسلام آباد: متحدہ قومی موومنٹ (پاکستان) نے حالیہ بارشوں اور اربن فلڈنگ کے پیشِ نظر وفاقی حکومت سے ملک کے سب سے بڑے شہر کراچی اور حیدر آباد کو آفت زدہ قرار دینے کا مطالبہ کیا ہے۔

تفصیلات کے مطابق ایم کیو ایم نے وفاقی حکومت سے سندھ کے دو بڑے شہروں کو آفت زدہ قرار دینے کے ساتھ ساتھ کراچی کے یوٹیلٹی بلز معاف کرنے کی بھی اپیل کی۔ امین الحق نے کہا کہ اگر بل معاف نہیں کیے جاتے تو بارش سے متاثرہ شہریوں سے کچھ رعایت ہی کر لی جائے۔

یہ بھی پڑھیں:

شنگھائی تعاون تنظیم، بلاول بھٹو کی اجلاس میں شرکت

ایم کیو ایم کے وفاقی وزیر امین الحق نے ایوان میں خطاب کرتے ہوئے کہا کہ کراچی میں حالیہ بارشوں کے دوران جاں بحق ہونے والے افراد کے لواحقین کو معاوضہ دیا جائے تاہم وفاقی حکومت کی جانب سے ایم کیو ایم (پاکستان) کے مطالبات کا کوئی مثبت اور حوصلہ افزاء ردِ عمل سامنے نہیں آیا۔

وزیر اعظم شہباز شریف کا گزشتہ روز قومی اسمبلی میں خطاب کے دوران کہنا تھا کہ مانتا ہوں کہ گزشتہ 3 ماہ میں اشیاء کی قیمتیں بڑھ گئیں تاہم بین الاقوامی سطح پر تیل اور گیس کی قیمتیں میرے اختیار میں نہیں ہیں۔ حکومت معیشت کو ٹھیک کرنے کی کوشش کر رہی ہے۔

دوسری جانب وزیرِ خارجہ بلاول بھٹو زرداری نے بھی معاشی صورتحال پر بے بسی کا اظہار کرتے ہوئے کہا کہ ہمارے پاس جادو کی چھڑی نہیں کہ 3 ماہ میں سب کچھ ٹھیک کردیں۔ حکومت 4سال میں جمع کیا ہوا گند صاف کرنے کی کوشش کر رہی ہے جو 3 ماہ میں صاف نہیں کیا جاسکتا۔