گوگل نیوز پر ہمیں فالو کریںکراچی: حکومت کی حلیف متحدہ قومی موومنٹ (پاکستان) کی مرکزی قیادت نے کے۔الیکٹرک بلز میں نئے ٹیکس عائد کرنے کی شدید الفاظ میں مذمت کی ہے۔
تفصیلات کے مطابق کے الیکٹرک کے بلز میں نئے معاہدے کے تحت ٹیکس عائد کرنے کی مخالفت کرتے ہوئے متحدہ رہنماؤں کا کہنا ہے کہ اربوں روپے کا ٹیکس ادا کرنے کے باوجود کراچی کو سہولیات مہیا نہیں کی جارہیں۔
کے الیکٹرک شہریوں سے میونسپل ٹیکس بھی وصول کرے گی
متحدہ رہنماؤں کا کہنا ہے کہ کے ایم سی ٹیکس پیپلز پارٹی کی سندھ حکومت کی جانب سے کراچی کے عوام پر عائد کیا گیا آمرانہ فیصلہ ہے۔ جبری ٹیکس وصولی کی ہر سطح پر مخالفت کریں گے۔
خیال رہے کہ اس سے قبل سندھ حکومت اور کے۔الیکٹرک کے درمیان معاہدہ طے پاگیا جس کے تحت صارفین کو بجلی کے بلوں کے ساتھ میونسپل ٹیکس بھی ادا کرنا ہوگا۔
آج سے 3 روز قبل سامنے آنے والے سرکاری فیصلے کے تحت کے ایم سی کے واجبات کی وصولی کیلئے کے الیکٹرک صارفین سے میونسپل ٹیکس کی مد میں سالانہ 3 ارب روپے وصول کرے گی۔
کے الیکٹرک اور کے ایم سی کے درمیان طے پانے والے معاہدے کے تحت کے الیکٹرک بل کے ذریعے کراچی کے شہریوں کی جیب سے ماہانہ 25 کروڑ روپے کا ٹیکس وصول کیے جانے کا فیصلہ کیا گیا۔
