ہالی ووڈ اداکار مورگن فری مین کے روس میں داخلے پر پابندی عائد

واشنگٹن: روس نے 963 امریکی شہریوں کی فہرست شائع کی ہے جن پر یوکرین پر حملے سے متعلق امریکی پابندیوں کے جواب میں ملک میں داخلے پر مستقل پابندی عائد کردی گئی ہے۔ ہالی ووڈ اداکار مورگن فری مین بھی پابندی کا نشانہ بن گئے۔ 

ہالی ووڈ کے 84 سالہ اداکار مورگن فری مین کا نام بظاہر 2017 میں ایک ویڈیو کلپ میں نمودار ہونے کے نتیجے میں فہرست میں شامل کیا گیا جس میں روسی حکومت پر امریکی جمہوریت میں مداخلت کا الزام لگایا گیا تھا۔

یہ بھی پڑھیں:

صبا قمر کی فلم ’کملی‘ پر دلچسپ معلومات، جانئے

ہالی ووڈ کے سینئر ترین اداکار مورگن فری مین نے دی کمیٹی ٹو انویسٹی گیٹ روس نامی تنظیم کے لیے پروموشنل ویڈیو میں کام کیا۔ اس ویڈیو کی ہدایات فلمساز روب رینر نے دیں جو دی پرنسس برائیڈ اور وین ہیری میٹ سیلی سمیت دیگر فلمز کے لیے مشہور ہیں، اور انہیں کریملن کی فہرست میں بھی شامل کر لیا گیا ہے۔

روسی وزارت خارجہ کا کہنا ہے کہ فہرست میں شامل افراد روسوفوبیا کے ذمہ دار ہیں۔روس کی جانب سے امریکی حکومت کے روس مخالف اقدامات کو مناسب جواب دینے کا سلسلہ جاری رکھنے کا عندیہ دیا گیا ہے۔

ترجمان روسی وزارتِ خارجہ نے کہا کہ روس کی طرف سے جوابی پابندیاں عائد کی گئی ہیں جن کا مقصد حکمران امریکی حکومت کو مجبور کرنا ہے کہ وہ نئے جغرافیائی سیاسی حقائق کو تسلیم کرتے ہوئے اپنا رویہ بدلے۔