گوگل نیوز پر ہمیں فالو کریںجنیوا: دنیا بھر میں کورونا وائرس کے باعث مزید 2 ہزار 349 افراد ہلاک ہو گئے جس کے نتیجے میں اب تک مجموعی اموات کی تعداد 18 ہزار 907 ہو گئی ہے۔
کورونا وائرس کے باعث متاثر ہونے والے افراد کی تعداد میں بھی اضافہ ہو رہا ہے۔ موجودہ اعدادوشمار کے مطابق وائرس سے 4 لاکھ 22 ہزار سے زائد افراد متاثر ہوچکے ہیں۔
ورلڈ و میٹرز کے مطابق اب تک 4 لاکھ 22 ہزار 829 افراد کورونا وائرس سے متاثر ہوئے جن میں سے 13 ہزار 95 افراد کی حالت تشویش ناک ہے۔
وائرس کے باعث متاثر ہونے والے افراد میں سے 1 لاکھ 9 ہزار 102 افراد شفا یاب ہوچکے ہیں جسے ایک حوصلہ افزا صورتحال قرار دیا جارہا ہے تاہم وائرس کے تشویشناک کیسز کی تعداد میں اضافہ ہوا ہے۔
اب تک 197ممالک میں کورونا وائرس پائے جانے کی اطلاعات موصول ہوئی ہیں جبکہ وائرس کے باعث اٹلی، ایران، ہانگ کانگ، فلپائن اور یورپ میں بھی ہلاکتیں ہوئیں۔وائرس پاکستان اور ہمسایہ ممالک سمیت امریکا بھی پہنچ گیا ہے۔
یاد رہے کہ اس سے قبل صوبہ خیبر پختونخوا میں کورونا وائرس کے 40 نئے کیسزکی تصدیق ہوئی۔ نئے کیسز میں سے 37 افراد حال ہی میں کے پی کے پہنچے تھے۔پاکستان میں کورونا وائرس سے 7 اموات کی اطلاع موصول ہوئی ہے جبکہ متاثرین کی تعداد 958 ہوگئی۔
سندھ میں گزشتہ روز وبائی مرض سے متاثرہ مریضوں کی تعداد 407 ، بلوچستان میں 110 ، پنجاب میں 267 ، خیبر پختونخوا میں 78 ، گلگت بلتستان میں 80 ، اسلام آباد میں 15 اور آزادکشمیر میں ایک مریض رپورٹ ہوچکا ہے۔
مزید پڑھیں: پاکستان میں کورونا وائرس کے مجموعی کیسز کی تعداد 958 ہو گئی
