تشدد کرنا ہو تو کریں، پی ٹی آئی کا ساتھ نہیں چھوڑینگے۔مونس الٰہی

اسلام آباد: سابق وفاقی وزیرِ آبی وسائل مونس الٰہی نے کہا ہے کہ ہم پر تشدد کرنا ہو تو کریں، پی ٹی آئی کا ساتھ نہیں چھوڑیں گے۔ انہوں نے منی لانڈرنگ کا مقدمہ درج ہونے کے بعد خود ایف آئی اے کے روبرو پیش ہونے کا فیصلہ کیا ہے۔

تفصیلات کے مطابق ق لیگ کے جواں سال رہنما و سابق وزیرِ آبی امور مونس الٰہی نے میڈیا سے گفتگو کرتے ہوئے کہا کہ ایف آئی اے نے مجھے گرفتار کرنے کیلئے ٹیمیں روانہ کیں، پیٹرول پہلے ہی مہنگا ہے، استعمال مت کریں۔

یہ بھی پڑھیں:

منی لانڈرنگ کا الزام، مونس الٰہی پر مقدمہ درج، 2 مبینہ فرنٹ مین گرفتار

گفتگو کے دوران سابق وفاقی وزیر مونس الٰہی نے کہا کہ میں وفاقی دارالحکومت اسلام آباد سے لاہور کی جانب جارہا ہوں، ایف آئی اے مجھ سے جو پوچھنا چاہے، پوچھ سکتی ہے۔ گرفتاری اور تشدد کرنا ہے تو وہ بھی کر لیں۔

سابق وزیرِ آبی امور نے کہا کہ گرفتاریوں اور تشدد کے بعد بھی ہم تحریکِ انصاف کا ساتھ نہیں چھوڑیں گے۔ سزا اس بات کی دی جارہی ہے کہ میں نے ان لوگوں کی بات نہیں مانی۔ شوگھر ملز میں سرمایہ کاری ڈکلیر کرچکا ہوں۔

قبل ازیں پاکستان مسلم لیگ (ق) کی جانب سے سابق وزیرِ آبی امور کے متعلق باضابطہ اعلامیہ جاری کردیا گیا جس میں کہا گیا ہے کہ منی لانڈرنگ کے مقدمے میں تفتیش کیلئے مونس الٰہی خود ایف آئی اے کے سامنے پیش ہوں گے۔