منی لانڈرنگ کیس، وزیراعظم اور وزیراعلیٰ پنجاب عدالت میں پیش

لاہور: وزیراعظم میاں شہباز شریف اور وزیراعلیٰ حمزہ شہباز منی لانڈرنگ کیس کی سماعت کے سلسلے میں عدالت میں پیش ہوگئے۔

تفصیلات کے مطابق لاہور کی اسپیشل کورٹ سینٹرل میں وزیراعظم اور وزیراعلیٰ کیخلاف منی لانڈرنگ کیس کی سماعت جاری ہے جس سلسلے میں دونوں شخصیات عدالت میں پیش ہوئیں۔

وزیراعظم کی عدالت آمد پر سکیورٹی کے سخت انتظامات کیے گئے ہیں اور عام سائلین کو عدالتی احاطے سے باہر نکال دیا گیا ہے۔

وزیراعلیٰ پنجاب حمزہ شہباز بھی کیس کی سماعت کے سلسلے میں عدالت میں پیش ہوگئے، اُن کے وکیل امجد پرویز عبوری ضمانت کی توثیق کیلئے دلائل دے رہے ہیں۔

واضح رہے کہ 11 نومبر 2020 کو احتساب عدالت نے میاں شہباز شریف اور ان کے صاحبزادے حمزہ شہباز شریف پر منی لانڈرنگ ریفرنس میں فرد جرم عائد کی تھی۔

کیس کے تمام ملزمان نے صحت جرم سے انکارکیا تھا جبکہ شہباز شریف نے نیب کے الزامات کو مسترد کرتے ہوئے کہا تھا کہ انہیں سیاسی طور پر نشانہ بنایا جا رہا ہے۔