گوگل نیوز پر ہمیں فالو کریںلاہور: چیئرمین کرکٹ بورڈ محسن نقوی نے پی سی بی کی سلیکشن کمیٹی کا اعلان کرتے ہوئے کمیٹی کو سربراہ سے محروم کردیا ہے۔
تفصیلات کے مطابق لاہور میں پریس کانفرنس کے دوران محسن نقوی نے کہا کہ ہم سلیکشن کمیٹی کی از سر نو تنظیم کر رہے ہیں جو 7افراد پر مشتمل ہوگی جس کا کوئی چیئرمین نہیں ہوگا، اور یہ سلیکشن کمیٹی کیلئے ایک نئی چیز ہے۔
پریس کانفرنس کے دوران محسن نقوی نے کہا کہ کمیٹی میں ہیڈ کوچ، کپتان اور ایک اینالسٹ کے علاوہ محمد یوسف، وہاب ریاض، عبدالرزاق اور اسد شفیق کو شامل کیا گیا ہے۔ ساتوں ممبران کو مشاورت کے ساتھ سلیکشن کا اختیار ہوگا۔
چیئرمین پی سی بی نے کہا کہ سلیکشن کمیٹی کے ہر فیصلے کو حتمی شکل دینے کیلئے تمام ساتوں اراکین یکساں اختیارات کے حامل ہوں گے۔ قومی کرکٹ ٹیم کے کوچز کیلئے کام جاری ہے جو 4 یا 5دن میں ہوگا، نام فائنل ہونے پر میڈیا کو آگہی دیں گے۔
پی سی بی سربراہ محسن نقوی نے کہا کہ ہم کوچز کا عالمی اور ملکی سطح کا کمبی نیشن بنائیں گے، سب یہی چاہتے ہیں کہ ورلڈ کپ کیلئے مضبوط ٹیم بنے۔ کوچ کے متعلق جو نام میڈیا پر سامنے آیا، وہ بھاگ گیا۔ اس لیے عماد وسیم سے سادہ بات چیت ہوئی۔
محسن نقوی کا کہنا تھا کہ کرکٹ اور کھلاڑیوں پر خزانہ لگائیں گے، خزانہ خالی بھی چھوڑا تو کرکٹ کی بہتری پر خرچ کرنے کی خوشی ہوگی۔ بینکوں میں پیسے رکھنے کا فائدہ نہیں، کنٹریکٹ کے مطابق این او سی کی پالیسی یکساں رکھیں گے۔
