مراد سعید کو کس کارکردگی پر ایوارڈ ملا؟، کابینہ میں پھوٹ پڑگئی، وزراء وزیراعظم سے ناراض 

اسلام آباد: وزیراعظم عمران خان کی جانب سے مراد سعید کو نمبر ون وزیرقرار دینے پر وفاقی وزراء نے شدید ناراضگی کا اظہار کرتے ہوئے سوال اٹھایا ہے کہ انہیں کس کارکردگی پر ایوارڈ دیا گیا ہے۔

علی محمد خان نے وزراء کو ایوارڈ کیلئے منتخب کرنے پر شدید ردعمل کااظہار کیا ہے، علی محمد خان کا کہنا ہے کہ ان وزراء کو ایوارڈ سے نوازا گیا جن کی کارکردگی خراب اور ایوان میں جواب دینے بھی نہیں آتے جبکہ دیگر وزراء نے بھی ناراضگی کا اظہار کیا ہے۔

مزید پڑھیں:وزارتوں کی اچھی کارکردگی میں مراد سعید کا پہلا نمبر،وزیراعظم نے تعریفی سند دیدی

واضح رہے کہ وزیراعظم عمران خان نے گزشتہ روزوزیرِ مواصلات و پوسٹل سروسز مراد سعید کو بہترین کارکردگی کا مظاہرہ کرنے والا وزیر قرار دیتے ہوئے تعریفی سند سے نوازا تھا۔

تعریفی اسناد کی تقسیم کی تقریب وزیراعظم آفس میں منعقد ہوئی ،وزیراعظم نے بہترین کارکردگی دکھانے والے اراکین کو تعریفی اسناد سے نوازنے کے ساتھ وزارتوں کے ملازمین کو اضافی الاؤنسز بھی فراہم کرنے کااعلان کیا۔

وفاقی وزیر اسد عمر کی وزارت منصوبہ بندی، تخفیف غربت و سماجی تحفظ کی معاون خصوصی ثانیہ نشتر اور وزیر تعلیم شفقت محمود کی کارکردگی کو بھی سراہا گیا۔وزیر انسانی حقوق شیریں مزاری، وزیر داخلہ شیخ رشید، وزیر صنعت و پیداوار خسرو بختیار، وزیر خارجہ شاہ محمود قریشی کو سرٹیفکیٹ دیے گئے۔