میڈیا پلیٹ فارمز اور سوشل میڈیا کو کینسر سے آگاہی کیلئے مہمات میں شامل ہونا چاہیے، بیگم ثمینہ علوی

کراچی:صدر پاکستان کی اہلیہ بیگم ثمینہ عارف علوی نے عوام میں بریسٹ کینسر کے حوالے سے سماجی آگاہی مہمات کی ضرورت پر زور دیتے ہوئے کہا ہے کہ مختلف میڈیا پلیٹ فارمز اور سوشل میڈیا کو کینسر سے آگاہی کے لیے مہمات میں شامل ہونا چاہیے، ابتدائی مرحلے میں کینسر کی تشخیص کے لیے میموگرافی کی جانی چاہیے۔

ان خیالات کا اظہار انہوں نے پیر کو گورنر ہائوس کراچی میں کینسر آگاہی کے حوالے سے منعقدہ اجلاس میں کیا۔ انہوں نے اپنے خطاب میں شرکاء پر زور دیا کہ کینسر آگاہی سیشنز کے لیے مہمات شروع کی جائیں۔

مزید پڑھیں:افغان خواتین کو یونیورسٹی جانے کی اجازت، مخلوط تعلیم پرپابندی

انہوں نے تجویز دی کہ لیڈی ہیلتھ ورکرز کو میموگرافی کے حوالے سے ان کے دورے کے دوران فلائر اور بینر فراہم کیے جائیں تاکہ لوگوں کو ان کی دہلیز پر رہنمائی کی سہولت میسر ہو سکے۔

انہوں نے کہا کہ فلائرز اور بینرز کو سندھی اور پشتو زبانوں میں بھی شائع کیا جانا چاہیے تاکہ مقامی کمیونٹی آسانی سے سمجھ سکے۔

اسی طرح آگاہی کے لیے کچی آبادیوں پر بھی خصوصی توجہ دی جانی چاہئے اور انہیں کینسر سے بچاؤ کے لیے میموگرافی کی طرف راغب کیا جائے۔

انہوں نے کہا کہ گلابی رنگ کو چھاتی کے کینسر کے حوالے سے بیداری کی علامت اور نشان کے طور پر اپنایا جانا چاہیے۔ انہوں نے مزید کہا کہ یونیورسٹیوں اور سکولوں کو آگاہی سیمینار اور اجلاس منعقد کر کے اس مہم میں شامل ہونا چاہیے۔