ادارے نواز شریف کے بیانیے پر چلیں گے،مریم نوازکادعویٰ

مظفرآباد:مسلم لیگ (ن) کی نائب صدر مریم نواز نے کہا ہے کہ آزاد جموں و کشمیر میں پی ٹی آئی کی پوزیشن انتہائی کمزور نظر آرہی ہے، آئندہ انتخابات میں (ن) لیگ کی جیت کا امکان روشن ہے۔وہ وقت دور نہیں جب ادارے نواز شریف کے بیانیے پر چلیں گے۔

مریم نواز نے پیر کو آزاد کشمیر میں انتخابات کے سلسلے میں ایک عوامی ریلی سے خطاب کرتے ہوئے کہا کہ لوگوں کا جوش دیکھ کر ایسا لگتا ہے کہ شیر دوبارہ وادی میں آرہا ہے۔ انہوں نے کہا کہ کشمیریوں کا خون میری کی رگوں میں بہہ رہا ہے۔

مریم نواز کا کہنا تھا کہ فوجی جوانوں کی تنخواہیں جب بھی بڑھیں نواز شریف کے دور میں بڑھیں، عمران خان کے دور میں فوجی جوانوں کی تنخواہیں نہیں بڑھیں، کچھ لوگ ذاتی مفاد کے لیے نواز شریف کے خلاف پروپیگنڈا کرتے ہیں لیکن نواز شریف کا دشمن بھی ان کی حب الوطنی کی گواہی دیتا ہے،وہ وقت دور نہیں جب ادارے نواز شریف کے بیانیے پر چلیں گے۔

مریم نواز نے مہنگائی پر حکومت کوتنقید کا نشانہ بناتے ہوئے کہا کہ انسولین 400 روپے میں فروخت ہوتی تھی ، اب یہ 1100 میں فروخت ہورہی ہے۔

انہوں نے اپنے کشمیری حامیوں کو بتایا کہ انہوں نے سنا ہے کہ وزیر اعظم عمران خان کشمیر میں ووٹ مانگنے آرہے ہیں۔ انہوں نے ریلی کے شرکا سے کہا کہ وہ وزیر اعظم سے پوچھیں کہ کیا انہیں  ایک کلو چینی کے لئے بھی لمبی لمبی قطار میں کھڑا کریں گے۔

مزید پڑھیں: پنجاب کے سیاسی میدان میں ہلچل، وزیر اعظم لاہور کا ایک روزہ دورہ آج کریں گے

انہوں نے کہا کہ پی ٹی آئی ووٹ چوری کرنے میں ماہر ہے،وہ انتخابات کے دوران نہ صرف آر ٹی ایس سسٹم بٹھادیتے ہیں بلکہ الیکشن کمیشن کے پورے عملے کو بھی اغواء کرلیتے ہیں۔ آزاد جموں و کشمیر میں تحریک انصاف کی پوزیشن کمزور ہے۔

مریم نوازنے کہا کہ عمران خان نے شریف خاندان کے افراد کے خلاف بدعنوانی کے غلط الزامات عائد کئے ،عمران خان بزدل ہیں سیاسی میدان میں نواز شریف کا سامنا نہیں کرسکتے۔

انہوں نے کہا کہ حکومت نواز اور شہباز شریف کے خلاف کرپشن کا کوئی مقدمہ ثابت نہیں کرسکتی ،شاہد خاقان عباسی اور حمزہ شہباز پر بھی بدعنوانی کے الزامات ثابت نہیں ہوئے۔