ایک بار پھر سلیکٹرز بےنقاب، اب چھپنے کی جگہ بھی نہیں ملے گی، مریم نواز

لاہور: مسلم لیگ ن کی مرکزی نائب صدر مریم نواز نے سینیٹ ہال سے کیمرے نکلنے پر ردعمل کا اظہار کرتے ہوئے کہا ہے کہ اب سلیکٹرز کو چھپنے کی جگہ بھی نہیں ملے گی، یوسف رضا گیلانی اور عبدالغفور حیدری کامیاب ہونگے۔

چیئرمین سینیٹ کے انتخاب سے قبل پولنگ بوتھ سے کیمرے برآمد ہونے پر اپنے ٹوئٹرپیغام میں  انہوں نے کہا کہ ایک بار پھر سلیکٹرز بےنقاب ہوگئے ہیں،حکومت اوچھے ہتھکنڈوں پر اترا آئی ہے لیکن اب سلیکٹرز کو چھپنے کی جگہ بھی نہیں ملے گی۔

ایک بار پھر سلیکٹرز بےنقاب۔۔۔۔
اب سلیکٹرز کو چھپنے کی جگہ بھی نہیں ملے گی

— Maryam Nawaz Sharif (@Shamsa_Nawaz) March 12, 2021

اس سے قبل انہوں نے اپنے ٹوئٹر پیغام میں کہا تھا کہ عوام کا آٹا چینی کھا گئے، خود اے ٹی ایمزکے پیسے پر عیش کرتے ہو اور کروڑوں عوام پر مہنگائی اور نا اہلی کا عذاب مسلط کر کے بھاشن دیتے ہو؟ یا عاصم سلیم باجوہ کو سنا رہے ہو جس کے اربوں روپے کو آپ نے تحفظ دیا؟ دنیا کو پاگل سمجھ رکھا ہے کیا؟ یا احمقوں کی جنت میں بستے ہو۔

مزید پڑھیں:چیئرمین کا الیکشن، اپوزیشن نے سینیٹ ہال سے خفیہ کیمرے ڈھونڈ نکالے، ایوان میں ہنگامہ

ان کا کہنا تھا کہ اس جماعت کی کیا سیاسی حیثیت یا عزت ہو گی جو سینیٹ میں اکثریتی پارٹی ہونے کے باوجود اپنی جماعت کے رکن کو چیئرمین کے لیے نامزد نا کر سکے اور اسکے لیے اسکو اسٹیبلشمنٹ کے آگے ناک رگڑنی پڑے اور جس نے ڈپٹی چیئرمین کے لیے ن لیگ ہی کے سینٹر کو نامزد کر دیا ۔

ان کا کہنا تھا کہ یوسف رضا گیلانی اور مولانا عبدالغفور حیدری56 ،56 ووٹ لے کر نئے چیئرمین سینیٹ اور ڈپٹی چیئرمین سینیٹ بنیں گے۔