وزیر اعظم عمران خان کی لگائی آگ بجھانے کی کوشش کر رہے ہیں۔مریم نواز

چشتیاں: مسلم لیگ (ن) کی نائب صدر مریم نواز نے کہا ہے کہ وزیر اعظم شہباز شریف عمران خان کی لگائی ہوئی آگ بجھانے کی کوشش کررہے ہیں جبکہ پی ٹی آئی کوئی سیاسی جماعت نہیں۔

تفصیلات کے مطابق چشتیاں میں جلسے سے خطاب کرتے ہوئے سابق وزیر اعظم نواز شریف کی صاحبزادی مریم نواز نے کہا کہ نہ تو عمران خان کوئی سیاستدان ہیں، نہ پی ٹی آئی کوئی سیاسی جماعت، بلکہ یہ بدمعاشوں اور اوباشوں کا ٹولہ ہی کہا جاسکتا ہے۔

یہ بھی پڑھیں:

میری پیشی پر ایسے انتظامات کیے گئے ہیں جیسے کلبھوشن آرہا ہو، عمران خان

جلسے سے خطاب کے دوران مریم نواز نے کہا کہ عمران خان اور پی ٹی آئی ٹولہ غیر ممالک سے پیسہ وصول کرکے پاکستان میں آگ لگانے کی سازش کرتا ہے۔ آئی ایم ایف سے معاہدہ تو عمران خان نے توڑا اور قیمت پاکستان کو دینی پڑ رہی ہے۔ 

بعد ازاں میڈیا سے گفتگو کے دوران مریم نواز کا کہنا تھا کہ عمران خان اقتدار میں ہوں یا باہر، وہ تباہی ہی مچاتے ہیں۔ جو شخص پاکستان کی اقدار اور اداروں پر حملے کرے، اس سے زیادہ خطرناک اور کون ہوگا؟ ہم اس خطرناک کو گھر تک پہنچائیں گے۔

گفتگو کے دوران مریم نواز نے کہا کہ عمران خان دھمکیاں کسی اور کو دیں۔ عدالت سے گزارش ہے کہ عمران خان پر فردِ جرم عائد کرنے کی بجائے سزا دیں۔ توہینِ عدالت ہو، فارن فنڈنگ ہو یا توشہ خانہ، عمران خان قصور وار ہیں جس کے ثبوت موجود ہیں۔