منچھر جھیل کی سطح بلند، بند ٹوٹنے سے سیہون کی 5 یونین کونسلز ڈوب جانے کا خدشہ

کراچی: ملک کی سب سے بڑی جھیل منچھر میں پانی کی سطح بلند ہوگئی، بند ٹوٹ جانے کے خدشے کے پیشِ نظر سیہون شریف کی 5 یونین کونسلز ڈوب سکتی ہیں۔ متعلقہ اداروں کو الرٹ کردیا گیا۔

تفصیلات کے مطابق منچھر جھیل کا بند ٹوٹنے سے ممکنہ سیلابی صورتحال کے پیشِ نظر علاقہ مکینوں نے گھر بار چھوڑ کر نقل مکانی کا آغاز کردیا۔ بند پر بڑھتے ہوئے دباؤ اور تیز ہوا کے باعث پیدا ہونے والی لہروں سے 5 یونین کونسلز ڈوبنے کے خدشات بڑھ گئے۔

یہ بھی پڑھیں:

وزیر اعظم سیلاب متاثرین سے اظہارِ یکجہتی کیلئے چین اور سری لنکا کے شکرگزار

جھیل کا پانی کناروں سے اوور فلو ہو کر دانستر ریگولیٹر کے دروازوں کے اوپر سے گزرنے لگا۔ میہڑ اور جوہی شہر کے رنگ بندوں پر بھی پانی کے دباؤ میں اضافہ ہورہا ہے۔ عوام اپنی مدد آپ کے تحت مٹی بوریوں میں بھر بھر کر بند مضبوط کرنے کی کوشش کر رہے ہیں۔

حکومت نے منچھر جھیل کا پانی دریائے سندھ میں منتقل کرنے کیلئے مشینری لگا دی۔ مٹیاری کے قریب روہڑی کینال کا چنڈن شاخ والا گیٹ تاحال ٹوٹا ہوا ہے جس سے پانی 4 مقامات سے باہر آنے لگا۔ سیہون کے علاوہ مٹیاری اور قومی شاہراہ بھی زیرِ آب آسکتی ہے۔

خیال رہے کہ پاکستان میں میٹھے پانی کی سب سے بڑی جھیل منچھر دریائے سندھ کے مغرب میں واقع ضلع دادو میں بہتی ہے جو کراچی سے 280 کلومیٹر کے فاصلے پر ہے۔ کہا جاتا ہے کہ منچھر جھیل موہن جو دڑو اور ہڑپہ کی تہذیبوں سے بھی قبل معرضِ وجود میں آئی تھی۔