گوگل نیوز پر ہمیں فالو کریںملائیشیا کی کم لاگت معروف ایئرلائن ایئرایشیا ایکس نے پاکستان کی فضائی صنعت میں باضابطہ قدم رکھتے ہوئے کراچی کے لیے براہ راست پروازوں کا آغاز کر دیا ہے۔
ایئرلائن کی افتتاحی پرواز کوالالمپور سے گزشتہ روز جناح انٹرنیشنل ایئرپورٹ کراچی پہنچی، جس میں 315 مسافر سوار تھے۔ پرواز کے استقبال کے لیے روایتی انداز میں واٹر کینن سلامی دی گئی، جو نئے فضائی راستے کے آغاز کا علامتی خیر مقدم ہے۔
یہ نیا فضائی رابطہ پاکستان اور ملائیشیا کے درمیان دوطرفہ تعلقات کو مضبوط بنانے اور باہمی روابط کو فروغ دینے میں اہم کردار ادا کرے گا اور کاروبار و سیاحت کے لیے کم خرچ اور طویل فاصلے کے سفری مواقع فراہم کرے گا۔
ایئرایشیا ایکس جو عالمی سطح پر کم قیمت بین الاقوامی سفر کے لیے مشہور ہے، اب کراچی کو اپنے جنوبی ایشیائی نیٹ ورک میں شامل کر چکی ہے، جس سے اس کی موجودگی اس خطے میں مزید وسیع ہو گئی ہے۔
ایئرپورٹ حکام اور ایئرلائن کے نمائندوں نے ایئرایشیا کے عملے اور مسافروں کا گرمجوشی سے استقبال کیا اور اس نئی سروس کے ذریعے سیاحت، تجارت اور عوامی روابط کے فروغ کی امید ظاہر کی۔
ایئرلائن کے مطابق کراچی اور کوالالمپور کے درمیان ہفتے میں چار پروازیں چلائی جائیں گی، جو پاکستانی مسافروں کو نہ صرف ملائیشیا کی سیر بلکہ ایئرایشیا کے وسیع نیٹ ورک کے ذریعے دنیا بھر سے رابطے کی سہولت بھی فراہم کریں گی۔
