کراچی سمیت ملک کے مختلف شہروں میں بد ترین لوڈ شیڈنگ، عوام سراپا احتجاج

وفاقی دارالحکومت اسلام آباد اور کراچی سمیت ملک کے مختلف شہروں میں بد ترین لوڈ شیڈنگ کا سلسلہ جاری ہے جس پر سراپا احتجاج عوام نے حکومت سے بجلی کے تقسیم کار اداروں کو کنٹرول کرنے کا مطالبہ کیا ہے۔

تفصیلات کے مطابق کراچی، لاہور اور اسلام آباد سمیت  ملک کے مختلف شہروں میں بجلی کی فراہمی زیادہ تر منقطع رہنے لگی۔ کراچی میں لوڈ شیڈنگ کا دورانیہ 10 سے 14 گھنٹے تک جا پہنچا۔

یہ بھی پڑھیں:

ڈالر 193 روپے کی نئی بلند ترین سطح پر پہنچ گیا

بلوچستان کے صوبائی دارالحکومت کوئٹہ میں 8، 8 گھنٹے تک بجلی بند رہنے لگی۔ حیدر آباد اور ملتان میں بجلی کی بندش کا دورانیہ 10 سے 12 گھنٹے ہوگیا جس پر عوام سراپا احتجاج ہیں۔

دوسری جانب معاشی تجزیہ کاروں کا کہنا ہے کہ ملک بھر میں بجلی کی پیداوار کم جبکہ طلب زیادہ ہے۔ پاکستان بھر میں بجلی کا مجموعی شارٹ فال 4 ہزار 743 میگا واٹ تک جا پہنچا ہے۔

ملک بھر میں بجلی کی مجموعی پیداوار 20 ہزار 757 میگا واٹ ہے جبکہ طلب 25 ہزار 500 میگا واٹ تک جا پہنچی۔ شارٹ فال میں اضافے کے باعث عوام کو لوڈ شیڈنگ کا سامنا کرنا پڑ رہا ہے۔