گوگل نیوز پر ہمیں فالو کریںارجنٹائن سے تعلق رکھنے والے دنیائے فٹبال کے معروف اسٹرائیکر لیونل میسی نے سال کے بہترین کھلاڑی کا ایوارڈ بالن ڈور 2023 آٹھویں مرتبہ جیت لیا۔
پیرس میں منعقد کی گئی تقریب میں میسی کو سال 2023 کا بہترین کھلاڑی قرار دیا گیا۔
تقریب میں میسی کی ارجنٹائن ٹیم کے ساتھی امیلیانو مارٹینیز نے بہترین گول کیپر کی یاشن ٹرافی جیت لی جبکہ انگلینڈ اور ریال میڈرڈ کے مڈ فیلڈر جوڈ بیلنگھم کو کوپا ایوارڈ سے نوازا گیا۔
لیونل میسی کا ورلڈکپ 2022 میں ارجنٹائن کو 36 سال بعد تیسری بار ورلڈکپ جتوانے میں اہم کردار رہا، میسی نے ورلڈکپ 2022 میں 7 گول مارے،3 گول میں مدد کی جبکہ انہوں نے گزشتہ سیزن کے دوران 41 میچوں میں 21 گول اسکور کیے۔
پانچویں کومبیکس ایشین تائیکوانڈو اوپن چیمپئن شپ 5 نومبر سے شروع ہوگی
مزید برآں میسی نے رواں سال امریکی فٹبال کلب انٹر میامی کو پہلی بار لیگز کپ جتوانے میں بھی کلیدی کردار ادا کیا، انہوں نے میجر لیگ کے 14 مقابلوں میں 11 گول بھی اسکور کیے تھے۔
میسی سب سے زیادہ 8 مرتبہ ’بالن ڈور‘ ایوارڈ جیت چکے ہیں، انہوں نے بالن ڈورایوارڈ پہلی مرتبہ 2009 میں جیتا تھا جبکہ 2010، 2011، 2012، 2015، 2019 اور 2021 میں بھی یہ ایوارڈ میسی کے نام رہا۔
پرتگال کے کرسٹیانو رونالڈو نے یہ ایوارڈ 5 بار اپنے نام کیا ہوا ہے، رونالڈو نے آخری بار 2017 میں سال کے بہترین فٹبالر کا ایوارڈ جیتا تھا۔
گزشتہ سال بالن ڈورایوارڈ فرانسیسی فٹبالر کریم بینزیما کے نام رہا تھا۔
واضح رہے کہ بالن ڈور ایوارڈ فرانس فٹبال کی جانب سے سال کے بہترین فٹبالر کو دیا جاتا ہے جبکہ اس میں دنیا بھر سے 100 صحافی فاتح کیلئے ووٹ کرتے ہیں۔
