لاہور میں ہلکی بارش سے موسم سرد، کراچی میں گرمی بڑھ گئی

طویل انتظار کے بعدبالآخر لاہور کے مختلف علاقوں میں ہفتے کی صبح ہلکی بارش ہوئی جب کہ دیگر علاقوں سے بوندا باندی کی اطلاع دی گئی جس سے ہوا میں نمی بڑھ گئی۔

دی مال، جیل روڈ، صدر چکر، گلبرگ، زمان پارک، گڑھی شاہو، دھرم پورہ، مغل پورہ، اچھرہ، مسلم ٹاؤن، مزنگ، چوبرجی، یتیم خانہ، ٹھوکر اور شملہ پہاڑی سے ہلکی ہوا کے ساتھ ہلکی بارش کی اطلاع ہے۔

اسی طرح صوبائی دارالحکومت کے دیگر علاقوں میں بھی بوندا باندی ہوئی۔

سردیوں کو الوداع کہنے کا وقت آگیا، کراچی میں موسم رنگ بدلنے لگا

دریں اثنا محکمہ موسمیات نے ہفتے کے روز آئندہ 24 گھنٹوں کے دوران ملک کے بیشتر علاقوں میں موسم سرد اور خشک رہنے کی پیش گوئی کی ہے۔

محکمہ موسمیات نے کہا ہے کہ شمال مغربی بلوچستان میں چند مقامات پر ہلکی بارش اور ہلکی برفباری ہو سکتی ہے۔

دوسری جانب کراچی کا موسم تبدیل ہوگیا ہے، رات کو ہلکی سردی کے بعد دن کے اوقات میں گرمی کی شدت میں اضافہ دیکھا گیا ہے۔