لبنانی وزیراعظم حسن دیاب اپنی پوری کابینہ سمیت مستعفی ہوگئے

بیروت: لبنانی وزیراعظم حسن دیاب اپنی پوری کابینہ سمیت مستعفی ہوگئے، انہوں نے استعفیٰ صدر میشال عون کو پیش کردیا، واضح رہے کہ لبنان کے دارالحکومت بیروت میں ہونے والے دھماکوں کے بعد ملک بھر میں احتجاجی مظاہروں کا سلسلہ جاری ہے، اس ساری صورتحال کے دوران وزراء سمیت مختلف ارکان پارلیمنٹ بھی مستعفی ہورہے ہیں۔

عرب میڈیا کے مطابق وزیر برائے پبلک ورک مشیل نجر نے اپنے بیان میں کہا ہے کہ میں امید کرتا ہوں کہ نگراں حکومت کی مدت طویل نہیں ہوگی کیونکہ ملک اس بات کا متحمل نہیں ہوسکتا، امید ہے کہ جلد ہی ایک نئی حکومت تشکیل دی جائے گی۔ جو ملک کو اس بحران سے نکال سکے گی۔

جبکہ لبنانی عدالت کے جج نے بیروت میں دھماکو سے متعلق سکیورٹی ایجنسیوں کے سربراہوں سے پوچھ گچھ شروع کردی۔اس سلسلے میں تفتیش کا دائرہ کار بڑھا دیا گیا ہے، جج غسان الخوری نے سرکاری سیکیورٹی کے سربراہ میجر جنرل ٹونی سیلیبا سے بھی چھان بین کی ہے۔

گزشتہ روز وزیر اطلاعات اور ماحولیات کے وزیر مستعفی ہوگئے تھے۔ وزیر اعظم حسن دیاب نے آج کابینہ کی میٹنگ بلائی تھی، تاہم اجلاس سے پہلے ہی وزیر انصاف اور بعد ازاں وزیر خزانہ نے بھی استعفیٰ دے دیا۔ وزیر خزانہ غازی وازنی لبنان کے لیے بیل آؤٹ پیکج کے لیے آئی ایم ایف سے مذاکراتی ٹیم کے سربراہ بھی تھے۔

یاد رہے کہ لبنان میں بم دھماکوں کے بعد عوام میں حکومت کے خلاف سخت اشتعال پایا جارہا ہے،چار اگست کو ہونے والے سانحے کے دو روز بعد مظاہرین اور میری کلوڈ نجم کے درمیان تلخ کلامی بھی ہوئی تھی۔