کورونا سے جاں بحق ہونیوالوں کیلئے ملیر میں 80 ایکڑ زمین قبرستان کیلئے مختص

کراچی : ملیر کے علاقے میں کوروناوائرس میں جاں بحق ہونے والے افراد کے لیے ملیر کے علاقے لنک روڈ کے قریب 80 ایکڑ زمین قبرستان کے لئے مختص کردی گئی۔

زمین مختص ہونے کے بعد ملیر انتظامیہ نے قبرستان کا کنٹرول سنبھال لیا، کوروناوائرس کا شکار مانسہرہ کالونی قائد آباد کے رہائشی کو قبرستان میں سخت حفاظتی انتظامات میں دفنا دیا گیا۔

کوروناوائرس کی بڑھتی ہوئی وبا کو مد نظر رکھتے ہوئے سندھ حکومت کی ہدایت پر ڈپٹی کمشنر ملیرشہزاد فضل عباسی نے سب ڈویژن بن قاسم دیھ جوریجی واقع لنک روڈ پر 80 ایکڑ سرکاری زمین قبرستان کے لئے مختص کردی گئی ہے۔

مزید پڑھیں: کورونا کے وائرس کیسز میں اضافے کے بعد رائیونڈ کو قرنطینہ قرار دیدیا گیا

زمین قبرستان کے لیے مختص ہونے کے بعد کورونا وائرس کا شکار ہونے والے ملیر کے پہلے جاں بحق ہونے والے مانسہرہ کالونی کے رہائشی 74 سالہ خان افسر ولد فتح خان کو اسی قبرستان میں دفن کردیا گیا ہے۔

کوروناوائرس کے شکار جان عمر کی تدفین کے موقع پر سخت حفاظتی انتظامات کیے گئے تھے جبکہ پولیس کی جانب سے قبرستان آنے اور جانے والے راستوں کو بھی سیل کردیا گیا تھا، اس موقع پر اسسٹنٹ کمشنر بن قاسم منشاد شاہانی،مختیار کار بن قاسم فرحان جتوئی ودیگر عملہ بھی موجود تھا۔