لاہور میں انسدادِ تجاوزات آپریشن کے دوران کروڑوں کی اراضی واگزار کرالی گئی

لاہور میں قبضہ مافیا کے خلاف کارروائی کی گئی ہے۔ انسدادِ تجاوزات آپریشن کے دوران کروڑوں کی اراضی واگزار کرا لی گئی۔

سماجی رابطے کی ویب سائٹ ٹوئٹر پر اپنے پیغام میں ڈپٹی کمشنر لاہور نے کہا کہ رم مارکیٹ میں بھاری مشینری کے ساتھ آپریشن کرکے 1 ارب روپے مالیت کی 3 کنال کی سرکاری اراضی کو واگزار کرا لیا گیا ہے۔

یہ بھی پڑھیں:

سندھ ہائیکورٹ، کورنگی میں انسدادِ تجاوزات آپریشن کی رپورٹ طلب

ٹوئٹر پیغام میں ڈی سی لاہور نے کہا کہ تین کنال پر بنے ہوئے اسٹرکچر کو مکمل مسمار کردیا گیا ہے۔ اسسٹنٹ کمشنر سٹی ملک مرتضیٰ نے آپریشن کی نگرانی کی۔ قبضہ مافیا کے خلاف قانونی کارروائی شروع کردی گئی ہے۔

آپریشن میں والڈ سٹی، ایم سی ایل اور ریونیو کے عملہ نے حصہ لیا. شہر میں قبضہ مافیا کے خلاف گھیرا تنگ کیا جا رہا ہے.@CS_Punjab @commissionerlhr pic.twitter.com/9wZ08fiPKq

— Deputy Commissioner Lahore (@DCLahore) September 4, 2022

اپنے ایک اور ٹوئٹر پیغام میں ڈی سی لاہور کا کہنا تھا کہ انسدادِ تجاوزات آپریشن میں والڈ سٹی، ایم سی ایل اور ریونیو کے عملے نے حصہ لیا۔ شہر میں قبضہ مافیا کے خلاف گھیرا تنگ کیا جارہا ہے۔ 

خیال رہے کہ کراچی اور لاہور سمیت ملک کے مختلف شہروں میں سرکاری اراضی پر ناجائز تجاوزات قائم کرکے شہروں کو کنکریٹ کا جنگل بنا دیا گیا ہے تاہم عدالتی احکامات پر شروع کیے جانے والے انسدادِ تجاوزات آپریشن سے صورتحال بہتر ہونے کی توقع کی جارہی ہے۔

آج سے 8 ماہ قبل سندھ ہائی کورٹ نے پی این ٹی ہاؤسنگ سوسائٹی میں غیر قانونی پورشنز کے متعلق درخواست کی سماعت کے دوران کورنگی میں انسدادِ تجاوزات آپریشن کی رپورٹ طلب کر لی تھی۔

 سندھ ہائی کورٹ میں کراچی میں کورنگی کے علاقے پی این ٹی ہاؤسنگ سوسائٹی سے متعلق درخواست کی سماعت 19 جنوری کو ہوئی۔ جج نے ریمارکس دیتے ہوئے کہا کہ آوے کا آوا بگڑا ہوا ہے۔ درخواست گزار نے کہا کہ 600 گز کے پلاٹ کے ٹکڑے غیر قانونی ہیں۔