گوگل نیوز پر ہمیں فالو کریںکراچی میں ایک اور افسوسناک حادثے میں ریڈ بس کے ڈرائیور کو دوسری ریڈ بس نے کچل کر ہلاک کر دیا ، جس کے بعد 2025 میں ٹریفک حادثات میں جاں بحق ہونے والوں کی تعداد 134 تک پہنچ گئی۔
ریڈ بس کے ڈرائیور عبدالرزاق اپنی ڈیوٹی پر جا رہے تھے کہ یہ حادثہ ملیر کے علاقے کھوکھراپار نمبر 2 میں پیش آیا۔
اہلِ خانہ کے مطابق عبدالرزاق ریڈ بس سروس کے ڈرائیور تھے۔ وہ ایک مقامی بس میں سوار ہو کر اپنی ڈیوٹی پر جا رہے تھے لیکن جب وہ بس سے اتر کر سڑک پار کر رہے تھے تو ایک اور ریڈ بس نے انہیں کچل دیا جس سے وہ موقع پر ہی جاں بحق ہو گئے۔
ریسکیو ٹیموں نے لاش کو قانونی کارروائی کے لیے اسپتال منتقل کر دیا۔ حکام نے تصدیق کی ہے کہ اس حادثے کے بعد رواں سال کراچی میں ٹریفک حادثات میں ہلاکتوں کی تعداد 134 ہو چکی ہے۔
پیر کے روز کراچی میں ایک اور حادثہ پیش آیا، جس میں دو صنعتکار اس وقت جان کی بازی ہار گئے جب ان کی گاڑی آئی سی آئی پل سے نیچے گر گئی۔
جاں بحق ہونے والوں کی شناخت 62 سالہ اشرف اور ان کے بیٹے نوید کے طور پر ہوئی، جبکہ ایک رکشہ ڈرائیور بھی زخمی ہوا۔
حادثہ اس وقت پیش آیا جب متاثرہ افراد سائٹ انڈسٹریل ایریا جا رہے تھے کہ ایک تیز رفتار ٹریلر نے ان کی گاڑی کو پیچھے سے ٹکر مار دی۔
ریسکیو ذرائع کے مطابق بے قابو ٹریلر نے گاڑی کو پیچھے سے ٹکر ماری، جس کے نتیجے میں گاڑی پل کی ریلنگ توڑ کر نیچے لوہے کے پائپوں پر جا گری۔
