کراچی، بارش شہریوں کے لیے زحمت بن گئی، کرنٹ لگنے سے 3 افراد جاں بحق

کراچی: مون سون کی بارشیں شہریوں کے لیے زحمت بن گئیں۔ شہر کے مختلف علاقوں میں بارش کے دوران کرنٹ لگنے کے واقعات میں تین افراد جاں بحق ہوگئے۔

کراچی کے علاقے محمد علی سوسائٹی شبیر آباد پیٹرول پمپ کے قریب کرنٹ لگنے سے 15 سالہ لڑکا جاں بحق ہوگیا۔ لڑکے کی لاش کو فوری طور پر ضابطے کی کارروائی کے لیے جناح اسپتال منتقل کردیا گیا، جہاں اس کی شناخت 15 سالہ اسحاق ولد ذوالفقار کے نام سے ہوئی۔

ایس ایچ او بہادر آباد کے مطابق متوفی چھوٹے بھائی کے ساتھ پیٹرول لینے آیا تھا، علاقہ مکینوں نے بتایا کہ بجلی کے تار ٹوٹ کر پانی میں گر گئے تھے اس دوران وہاں سے گزرتے ہوئے اسے کرنٹ لگ گیا۔ ایس ایچ او نے بتایا کہ متوفی محمد علی سوسائٹی کا ہی رہائشی تھا تاہم اس حوالے سے پولیس مزید تحقیقات کر رہی ہے۔

دریں اثنا نارتھ کراچی میں قائم ارسلان ہومز میں گھر کے دروازے سے 13 سالہ مزمل کو کرنٹ لگ گیا جسے فوری طور پر عباسی شہید اسپتال لے جایا گیا جہاں ڈاکٹروں نے معائنے کے بعد موت کی تصدیق کر دی۔

کورنگی کے علاقے سو کوارٹر مچھلی موڑ کے قریب گھر میں کرنٹ لگنے سے 65 سالہ سید مشرف جاں بحق ہوگیا جس کی لاش جناح اسپتال لائی گئی، ریسکیو حکام کے مطابق متوفی کو گھر میں پانی کی موٹر چلاتے ہوئے کرنٹ لگا۔ پولیس نے ضابطے کی کارروائی کے بعد لاش ورثا کے حوالے کردی ۔

واضح رہے کراچی میں گزشتہ تین دن سے مون سون کی بارشوں کا سلسلہ جاری ہے۔ بارش سے مختلف علاقوں کی سڑکیں ندی نالوں کا منظر پیش کرنے لگیں۔ گجر نالے میں پانی کا بہاؤ تیز ہوگیا۔ سڑکوں پر پانی کے ساتھ ساتھ کچرا بھی بہنے لگا۔