ویسٹ پولیس نے شہریوں سے لوٹ مار کرکے فرار ہونیوالے ملزم کو گرفتار کرلیا

کراچی:ویسٹ پولیس نے بروقت کارروائی کرکے شہریوں سے لوٹ مار کے بعد فرار ہونے والے ملزم کو گرفتار کرلیا۔

ایس ایس پی ویسٹ سوہائی عزیز کے مطابق ملزمان منگھوپیر روڈ پر موجود رکشہ ڈرائیور محمد نبی کو اسلحہ کے زور پر لوٹ کر فرار ہوئے۔متاثرہ شہری کی جانب سے گشت پر مامور پولیس موبائل کو اطلاع دی گئی۔

ایس ایچ او پیرآباد کی ٹیم نے شہری کی جانب سے اطلاع ملتے ہی ملزمان کا تعاقب کرتے ہوئے کارروائی کی جس کے دوران مسلح ملزم فضل ولد اسلم کوبمعہ غیر قانونی اسلحہ و ایمونیشن گرفتار کرلیا گیا۔

مزید پڑھیں:وزیر اعلی سندھ کا ضلع شرقی کا اچانک دورہ، میونسپل کمشنر شعیب ملک عہدے سے فارغ

ملزم نے دوران تفتیش انکشاف کیا کہ نماز عید کے بعد آنے والے شہریوں کو لوٹنے کے لئے ملزمان عیدگاہ کے قریب موجود تھے۔گرفتار ملزم کیخلاف شہری کی مدعیت میں ڈکیتی سمیت دیگر دفعات کے تحت مقدمات درج کرلئے گئے ہیں۔

گرفتار ملزم کو مزید وارداتوں میں شناخت اور تفتیش کے لئے تفتیشی حکام کے حوالے کردیا گیا ہے جبکہ ملزم سے برآمد اسلحہ فارنزک معائنے کیلئے بھیجا جائیگا۔ گرفتار ملزم کے موٹرسائیکل سوار فرار ساتھی ناصر کی گرفتاری کو یقینی بنانے کے لئے کارروائی عمل میں لائی جارہی ہے۔