جرنلسٹس پروٹیکشن بل کو جلد سندھ اسمبلی سے منظور کرالیا جائے گا، ناصر حسین شاہ

کراچی: صوبائی وزیر بلدیات سندھ ناصر حسین شاہ نے کہا ہے کہ خواہش ہے کہ جرنلسٹس پروٹیکشن بل کو سندھ اسمبلی کے جاری اجلاس میں ہی پیش کردیا جائے تاکہ جلد از جلد یہ قانون بن سکے۔

انہوں نے کہا کہ چیئرمین پاکستان پیپلز پارٹی بلاول بھٹو کی ہدایت پر سندھ حکومت صحافیوں کی صحت اور نوکریوں کے تحفظ کے لیے بھی ایک یونیورسل پروگرام پر کام کررہی ہے، صحافتی تنظیمیں اپنے ارکان کو محکمہ محنت کے پاس رجسٹرڈ کرائیں تاکہ قلم اور کیمرے کے مزدوروں کو بھی وہ حقوق مل سکیں جو صوبے کے دیگر مزدوروں کو حاصل ہیں۔

ان خیالات کا اظہار انہوں نے کراچی یونین جرنلسٹ کے وفد سے سندھ اسمبلی میں ملاقات کے موقع پر کیا۔کراچی یونین آف جرنلسٹس نے جرنلسٹس پروٹیکشن بل پر اپنی سفارشات سندھ حکومت کو پیش کردی ہیں، اس سلسلے میں ناصر حسین شاہ نے کے یو جے کو یقین دلایا ہے کہ جرنلسٹس پروٹیکشن بل کو جلد ہی سندھ اسمبلی سے منظور کرالیا جائے گا۔

کے یو جے کے وفد کی سربراہی صدر نظام الدین صدیقی کررہے تھے جبکہ دیگر ارکان میں جنرل سیکریٹری فہیم صدیقی، سینئر نائب صدر اعجاز شیخ اور سابق جنرل سیکریٹری احمد خان ملک شامل تھے جبکہ صوبائی سیکریٹری اطلاعات رفیق برڑو، ڈائریکٹر ایڈمن عظیم شاہ اور ڈائریکٹر پریس اینڈ انفارمیشن عزیز ہکڑو بھی اس موقع پر موجود تھے۔

کے یو جے کی جانب سے جنرل سیکریٹری فہیم صدیقی نے سندھ حکومت کے جرنلسٹس پروٹیکشن بل کو سراہتے ہوئے کہا کہ صحافیوں کی فلاح و بہبود کے حوالے سے حکومتی اقدامات میں یہ اب تک کی بہترین کوشش ہے،تاہم پھر بھی کے یو جے یہ سمجھتی ہے کہ صحافیوں کے تحفظ کو یقنینی بنانے اور ان کی فلاح و بہبود کے لیے اس میں مزید کچھ نکات کا اضافہ کیا جاسکتا ہے۔

کے یو جے نے بل پر اپنی سفارشات تحریری طور پر صوبائی وزیر کو پیش کیں جنہیں سراہتے ہوئے ناصر شاہ نے سیکریٹری اطلاعات کو ہدایت کی ہے کہ کے یو جے کی سفارشات کو بل میں شامل کیا جائے۔

کے یو جے کے وفد نے اس موقع پر صحافیوں کو ایکریڈیشن کارڈ کے اجرا میں درپیش مشکلات کا ذکر کرتے ہوئے انہیں دور کرنے کا بھی مطالبہ کیا جس پر صوبائی وزیر نے سیکریٹری اطلاعات کو ہدایت کی ہے کہ اس سلسلے میں بھی ایک یونیفارم پالیسی بنائی جائے تاکہ صحافیوں کو ایکریڈیشن کارڈ باآسانی جاری ہوسکیں۔