اُردن کے سابق وزیر نے ریاض-تہران معاہدے پر اپنے ردعمل کا اظہار کرتے ہوئے کہا ہے کہ اب عَمان (اردن کا دار الحکومت) اور تہران کے درمیان تعلقات کی بحالی کا بہترین وقت ہے۔

اردن کے سابق وزیر ثقافت اور یوتھ محمد ابو رمان نے کہا کہ یہ ایران اور اردن کے درمیان تعلقات کی بحالی کا بہترین موقع ہے۔ انہوں نے کہا کہ ان تعلقات کی بحالی ایک ضروری سفارتی امر ہے۔

یہ بھی پڑھیں:

محمد ابو رمان نے اس امر کی جانب زور دے کر کہا کہ خطے کی تبدیل ہوتی صورتحال اور اردن کے دوسرے ممالک کے ساتھ تعلقات کے پیرائے میں ایران اور ادرن کے تعلقات بھی ضروری ہیں۔

انہوں نے مزید کہا کہ میرے نزدیک دونوں ممالک کے درمیان تعلقات کی بحالی ایک ضروری سفارتی امر ہے اور میں اس بات کی پیش گوئی کر رہا ہوں کہ اس سلسلے میں تمام رکاوٹیں دور ہو جائیں گی۔

واضح رہے کہ اُردن بھی ان ممالک میں سے ہے، جس نے ایران اور سعودی عرب کے مابین ہونے والے معاہدے کا خیر مقدم کیا ہے۔ اسی سلسلے میں اردن کی وزارت خارجہ نے اپنے بیان میں اس امید کا اظہار کیا کہ اس معاہدے سے خطے میں امن و استحکام آئے گا۔ علاقائی ممالک خود مختار ہوں گے۔ خطے کے ممالک ایک دوسرے کے اندرونی معاملات میں مداخلت نہیں کریں گے اور مشترکہ مفادات کے تحفظ کے حصول میں مدد ملے گی۔