گوگل نیوز پر ہمیں فالو کریںکوئٹہ: دہشت گرد حملے کے بعد 17 روز تک معطل رہنے والی جعفر ایکسپریس کو بحال کر دیا گیا ہے اور یہ کوئٹہ سے پشاور کے لیے روانہ ہو چکی ہے۔
ٹرین کی بحالی کے موقع پر رکن قومی اسمبلی جمال شاہ نے افتتاحی تقریب میں شرکت کی جہاں ڈی ایس ریلوے سمیت دیگر ریلوے افسران بھی موجود تھے۔
بحال شدہ جعفر ایکسپریس 10 بوگیوں پر مشتمل ہے اور اس میں 400 سے زائد مسافر سوار ہیں۔ ریلوے اسٹیشن پر سخت سیکورٹی چیکنگ کی گئی جبکہ ٹرین میں بھی حفاظتی اقدامات کو مزید مؤثر بنایا گیا ہے۔
ریلوے حکام کے مطابق جعفر ایکسپریس کی 17 روزہ بندش کے باعث قومی خزانے کو 90 لاکھ روپے کا نقصان اٹھانا پڑا۔ ٹرین سروس کی معطلی کے باعث مسافروں کو شدید مشکلات کا سامنا تھا، تاہم اب اس کی بحالی سے سفری سہولتیں دوبارہ میسر آ گئی ہیں۔
جعفر ایکسپریس کو 11 مارچ 2025 کو دہشت گردوں کے حملے کا سامنا کرنا پڑا تھا۔ حملے میں ٹرین کو نقصان پہنچا جس کے بعد حکام نے سیکورٹی خدشات کے پیش نظر سروس معطل کر دی تھی۔
اس حملے نے ریلوے کے مسافروں میں خوف و ہراس پیدا کر دیا تھا اور حکومت کو سیکورٹی اقدامات کو مزید سخت کرنے کا فیصلہ کرنا پڑا۔
17 دن کے وقفے کے بعد، تمام حفاظتی انتظامات مکمل کرنے کے بعد جعفر ایکسپریس کو دوبارہ بحال کر دیا گیا ہے، جو کوئٹہ سے پشاور کے لیے روانہ ہو چکی ہے۔
