نئے سرے سے محاصرے کا فیصلہ، اسرائیل نے لبنان کو جنگ کی دھمکی دے دی

تل ابیب: اسرائیل نے نئے سرے سے محاصرے کے فیصلے کا عندیہ دیتے ہوئے لبنان کو جنگ کی دھمکی دے دی ہے۔ مقبوضہ فلسطین پر غاصبانہ طور پر قابض اسرائیلی حکومت کا کہنا ہے کہ اگر ہمارے لوگ نشانہ بنے تو لبنان پر حملہ کردیا جائے گا۔

تفصیلات کے مطابق اسرائیلی وزیرِ دفاع بینی گینٹز کا کہنا ہے کہ اگر اسرائیلی عوام پر آنچ آنے کا خدشہ ہوا تو لبنان کے خلاف جنگ کیلئے بھی تیار ہیں۔ عالمی برادری اسرائیلی فوج کو صیدا، بیروت اور صور کی سڑکوں پر چلتا ہوا دیکھے گی۔

یہ بھی پڑھیں:

ایلون مسک کی بیٹی کا باپ سے لاتعلقی کا اظہار، سابقہ اہلیہ مطمئن

لبنان کو دھمکی دیتے ہوئے اسرائیلی وزیرِدفاع کا کہنا تھا کہ اگر اسرائیلی شہریوں کو فوجی کارروائی کے دوران نشانہ بنایا گیا تو لبنان کا نئے سرے سے محاصرہ ہوگا۔ حزب اللہ کو بھاری نقصان پہنچانے کیلئے تیار ہیں۔ لبنان 6 جون 1982 کی جنگ یاد کرے۔

ماضی کی طرف اشارہ کرتے ہوئے اسرائیلی وزیر کا کہنا تھا کہ اسرائیلی فوج بیروت تک جا پہنچی تھی۔ 88 روز تک اسرائیلی فوج نے بحری و بری محاصرہ کیے رکھا۔ اگر لبنان میں فوجی کارروائی کیلئے مجبور ہوئے تو جنگ پہلے کے مقابلے میں سخت ہوگی۔

واضح رہے کہ لبنان اور اسرائیل کی سرحدیں آپس میں ملتی ہیں۔اسرائیلی وزیرِ دفاع نے کہا کہ حزب اللہ اور لبنان اسرائیل کے خلاف جنگ میں بھاری قیمت چکائیں گے۔ لبنان اور اسرائیل کی سمندری حدود سے متعلق فیصلہ لبنان کیلئے زندگی اور موت کا مسئلہ ہے۔