گوگل نیوز پر ہمیں فالو کریںعراقی وزیراعظم عادل عبدالمہدی کا کہنا ہے کہ غیر ملکی افواج کے محفوظ انخلا کے پارلیمنٹ کے فیصلے پر عملدرآمد کے لیے طریقہ کار طے کرنے کے لیے امریکا اپنے وفود عراق بھیجےتاکہ اس حوالے سے ایک لائحہ عمل مرتب کیا جاسکے۔
عراقی وزیراعظم عادل عبدالمہدی نے امریکی وزیر خارجہ مائیک پومپیوسے ٹیلیفونک رابطہ کیا اور ان سے درخواست کی کہ وہ اپنے وفود عراق بھیجیں جو عراق سے غیر ملکی افواج کی واپسی کے لیے عراقی پارلیمنٹ کے فیصلے پر عمل درآمد کے حوالے سے طریقہ کار طے کرے۔
وزیراعظم کے دفتر سے جاری بیان میں کہا گیاوزیراعظم عبدالمہدی کا کہنا تھا کہ وہ عراقی خودمختاری اور سالمیت کے خلاف ہر قسم کے اقدام کو رد کرتے ہیں،بیان کے مطابق عادل عبدالمہدی کاکہنا تھا کہ عر اق اپنے ہمسائیوں اور بین الاقوامی برادری سے بہترین تعلقات کا خواہاں ہے۔
بیان کے مطابق عراقی حکومت اپنی سرزمین پر موجود تمام غیرملکیوں اور ان کے اثاثوں کے تحفظ کے لیے ہر ممکن کوشش کرے گی،عراقی وزیراعظم نے کہا کہ امریکی فوج اور جنگی ساز وسامان حکومت کی اجازت کے بغیر عراق میں داخل ہو رہا ہے جو کہ موجودہ معاہدوں کی خلاف ورزی ہے۔
یہ بھی پڑھیں: امریکا ایران سے غیر مشروط مذاکرات کے لیے تیار، سلامتی کونسل میں خط
