زرعی برآمدات میں اضافے کیلئے عالمی 2 روزہ پاکستان ایگری ایکسپو کا انعقاد

لاہور: ملک کی زرعی برآمدات میں اضافے کیلئے عالمی 2 روزہ پاکستان ایگری ایکسپو منعقد کی جارہی ہے جس سے عالمی سطح پر پاکستان کی برآمدات بڑھنے کی توقع کی جارہی ہے۔

تفصیلات کے مطابق پاکستان میں ایگری ایکسپو کا انعقاد 18 جون سے 19 جون تک جاری رہے گا۔ ترجمان محکمۂ زراعت پنجاب کا کہنا ہے کہ محکمۂ زراعت 2 روزہ ایکسپو کا اہتمام کر رہا ہے جس سے ملک کی زرعی برآمدات بڑھیں گی۔ نمائش میں پاکستانی پھل، سبزیاں اور ان سے بنی مصنوعات رکھی جائیں گی۔

یہ بھی پڑھیں:

پاکستان میں گدھوں کی تعداد میں مسلسل اضافہ جاری

پنجاب کے صوبائی دارالحکومت لاہور کے علاقے جوہر ٹاؤن میں 18 جون سے 125 اسٹالز لگائے جائیں گے۔ رواں برس تاجکستان، بیلا روس، ازبکستان، سعودی عرب، قازقستان، قطر، متحدہ عرب امارات، انڈونیشیا، ملائشیا، ترکی، بحرین، اور دیگر ممالک سے ماہرین اور برآمد کنندگان نمائش میں شرکت کیلئے پاکستان آئیں گے۔

رواں برس عالمی نمائش سے قبل پاکستان میں ایسی 7 نمائشیں ماضی میں بھی ہوچکی ہیں جن میں 15 ممالک سے 100 وفود شریک ہوئے۔ ترجمان محکمۂ زراعت پنجاب کا کہنا ہے کہ پاکستان میں زرعی ایکسپو نمائشوں کے ذریعے برآمدات کے حجم میں 10 اعشاریہ 2 ملین ڈالرز کی مالیت کا خطیر اضافہ ہوا۔

انہوں نے کہا کہ پاکستان ایگری ایکسپو 2022 کا انعقاد شعبۂ زراعت سے وابستہ ملک بھر کے ایسے لوگوں کو پلیٹ فارم مہیا کرے گا جو پاکستانی مصنوعات کو دنیا بھر میں متعارف کرانا چاہتے ہیں۔ ملک کی زرعی برآمدات میں اضافے کے نتیجے میں پاکستان تجارتی خسارے سے چھٹکارہ حاصل کرسکے گا۔