پاکستان سمیت دنیا بھر میں عالمی یومِ مزدورر آج منایا جارہا ہے

اسلام آباد:  پاکستان سمیت دنیا بھر میں عالمی یومِ مزدور منایا جا رہا ہے جس کیلئے آج   مختلف ممالک میں تقاریب منعقد کی جائیں گی۔دن منانے کا مقصد دنیا بھر کے محنت کشوں کو خراجِ تحسین پیش کرنا ہے۔ 

ہر سال کی طرح رواں برس بھی یکم مئی مزدوروں کی توجہ کا مرکز بن گیا۔ پاکستان سمیت دنیا بھر میں مزدور رہنما جلسے جلوسوں کا اہتمام کریں گے جہاں یومِ مئی کے موقعے پر ریلیاں نکالی جائیں گی اور مزدوروں کے حقوق پر آگہی دی جائے گی۔تاریخ میں مزدور حقوق کی جدوجہد پر روشنی ڈالی جائے گی۔ 

یہ بھی پڑھیں:

پاکستان سمیت دنیا بھر میں صحت کا عالمی دن 

دنیا بھر میں مزدوروں کے حقوق کی جدوجہد آج بھی جاری ہے۔ عالمی یومِ مزدور منانے کا مقصد مزدوروں کے بنیادی انسانی و لیبر حقوق کے تحفظ کے حوالے سے آگہی پیدا کرنا ہے جبکہ یہ دن منانے کی تاریخ 130 سال سے زیادہ پرانی ہے جس کے تانے بانے مغرب سے جا کر مل جاتے ہیں۔ 

پاکستان سمیت دنیا بھر میں یہ دن شکاگو کے ان مزدوروں کی یاد میں منایاجاتا ہے جنہوں نے سب سے پہلے1836ء میں  اپنے حقوق کا مطالبہ کرتے ہوئے کہا کہ ہم 16، 12 یا 10 کی بجائے 8 گھنٹے کام کریں گے۔سرمایہ داروں نے مزدوروں کو 12 سے 16 گھنٹے روزانہ کام کرنے پر مجبور کر رکھا تھا۔ 

تاریخ سے پتہ چلتا ہے کہ اُس وقت کے صنعتکاروں اور سرمایہ داروں نے مزدوروں کی تحریک کو بزورِ قوت  کچلنا چاہا اور امریکی پولیس نے مزدوروں پر گولیاں برسا کر متعدد مزدوروں کی جانیں لیں، لیکن یہ تحریک کمزور نہ ہوسکی۔مزدوروں کے حقوق کی جدوجہد بھرپور عزم و حوصلے کے ساتھ شروع ہوئی۔ 

مزدور حقوق کے حصول کی جدوجہد کے دوران مزدور رہنماؤں اور عام مزدوروں کے خون نے یومِ مزدور کی تحریک کو وہ طاقت عطا کی کہ آج 134 سال گزر جانے کے باوجود عالمی برادری یکم مئی کو مزدوروں کا عالمی دن مناتی ہے۔ ہر سال اس جدوجہد پر اپنی جان کا نذرانہ پیش کرنے والوں کو خراجِ عقیدت پیش کیا جاتا ہے۔ 

عالمی دن کے موقعے پر پاکستان سمیت دنیا بھر میں سیمینارز، مذاکرے و مباحثے اور مجالس منعقد کی جائیں گی جہاں مزدوروں کے بنیادی حقوق اور لیبر قوانین پر گفتگو ہوگی۔متعدد ممالک میں مزدور رہنما اپنے حقوق کے حصول کی جدوجہد سے متعلق حقائق اور اب تک کی جدوجہد سے حاصل ہونے والے نتائج پر روشنی ڈالیں گے۔