پاکستان سمیت دُنیا بھر میں مظلوم فلسطینیوں سے یکجہتی کا عالمی دن

یروشلم: پاکستان سمیت دُنیا بھر میں مظلوم فلسطینیوں سے یکجہتی کا عالمی دن آج منایا جا رہا ہے جس کامقصد فلسطین کی جدوجہدِ آزادی کے حق میں اقوامِ متحدہ کی قرارداد کو یاد کرتے ہوئے عالمی برادری کو اس کے وعدے یاد دلانا ہے۔

تفصیلات کے مطابق اقوامِ متحدہ کی جنرل اسمبلی نے 29 نومبر 1947ء کو  منظور کی گئی قرارداد کے تحت مقبوضہ فلسطین کی غیر منصفانہ تقسیم کو قانونی شکل دی جہاں ایک حصے میں یہودی جبکہ دوسرے حصے میں فلسطینیوں کی حکومت کا قیام عمل میں آنا تھا۔

یہ بھی پڑھیں:

مسجدِ اقصیٰ کے قریب فائرنگ، فلسطینی خاتون سمیت 2افراد شہید

کشمیر اور فلسطین میں دہشت گردی کا نشانہ بننے والوں کو خراجِ تحسین

مذکورہ غیر منصفانہ قرارداد میں فلسطینیوں سے روا رکھے گئے ظلم و استبداد کو آگے چل کر اقوامِ متحدہ نے خود مانتے ہوئے جنرل اسمبلی سے 29 نومبر 1977ء کو ایک قرارداد منظور کی جس میں فلسطینیوں کے ساتھ یکجہتی کا عالمی دن منانے کا اعلان کیا گیا۔ 

ہر سال 29 نومبر کے روز غاصب اسرائیل کے خلاف سراپا احتجاج مظلوم فلسطینیوں کے حقِ خود ارادیت سے یکجہتی اور آزادئ فلسطین کے حق میں یہودی صیہونیوں سے مخالفت کا اعلان کیا جاتا ہے اور فلسطینیوں پر اسرائیلیوں کے ظلم و تشدد کی مذمت کیجاتی ہے۔

 آج بھی بے شمار فلسطینی بے گھر ہیں جن میں سے نصف 18 سال سے بھی کم عمر ہیں۔عرب دنیا سمیت متعدد مسلمان ممالک آزادئ فلسطین کے حق میں ہیں تاہم اسرائیل اور امریکا کے گٹھ جوڑ کے باعث فلسطین کی آزادی کا خواب تاحال شرمندۂ تعبیر نہیں ہوسکا۔ 

مقبوضہ فلسطین کی 47 فیصد آبادی غذائی قلط اور قحط جیسی صورتحال کا سامنا کر رہی ہے جبکہ غذا بنیادی انسانی حقوق میں سے ہے۔ یہودیوں کو دنیا بھر سے لا کر بسایا گیا اور فلسطینیوں کو ان کے وطن سے ہی بے دخل کیا گیا جبکہ رہائش ہر انسان کا بنیادی حق ہے۔