گوگل نیوز پر ہمیں فالو کریںدنیا بھر کے مختلف ممالک میں 2025 کا استقبال شاندار آتش بازی اور پرجوش تقریبات کے ساتھ کیا گیا، جہاں لوگ مشہور مقامات پر جمع ہوکر ان رنگین لمحات کا مشاہدہ کرتے رہے۔
آکلینڈ نے نئے سال کا آغاز کرنے والا پہلا بڑا شہر ہونے کا اعزاز حاصل کیا۔ ہزاروں لوگ آکلینڈ کے اسکائی ٹاور، نیوزی لینڈ کے سب سے بلند اسٹرکچر، کے قریب جمع ہوئے۔ شاندار آتش بازی اور دلکش روشنیوں کے مظاہرے نے لوگوں کو خوشی سے جھومنے پر مجبور کردیا۔
آسٹریلیا کے شہر سڈنی میں ہاربر برج سے آتشبازی کے شاندار مناظر پیش کیے گئے، جہاں ایک ملین سے زائد لوگ بندرگاہ پر جمع ہوئے۔ برطانوی گلوکار روبی ولیمز نے اپنی گائیکی سے محفل کو مزید گرما دیا۔
ہانگ کانگ میں وکٹوریا ہاربر کے اوپر آتشبازی نے آسمان کو روشنیوں سے بھر دیا، جبکہ انڈونیشیا کے جکارتہ میں لوگ انکول بیچ پر جمع ہوکر آتشبازی سے لطف اندوز ہوئے۔
بھارت میں لوگوں نے اپنے موبائل فونز کی روشنی سے آسمان کو روشن کردیا۔ سائبیریا کے یاکوتسک شہر میں درجہ حرارت منفی 47 ڈگری کے باوجود لوگوں نے کرسمس ٹری کے قریب نئے سال کا استقبال کیا۔
آسٹریا کے ویانا میں سلوسٹرپفاد فیسٹیول میں لوگوں نے موسیقی اور اسٹریٹ پرفارمنسز کے ساتھ خوشیوں کا مزہ لیا۔ لندن آئی پر روشنیوں کے شاندار مظاہرے نے سال 2025 کا شاندار استقبال کیا۔
نئے سال کی یہ تقریبات دنیا بھر میں جوش و خروش سے منائی گئیں اور ان لمحات کی تصاویر سوشل میڈیا پر وائرل ہوگئیں۔
