عمران خان کا سیلاب سے متاثرہ علاقوں کے دورے کا فیصلہ

اسلام آباد: پاکستان تحریک انصاف کے چیئرمین عمران خان نے سیلاب سے متاثرہ علاقوں کے دورے کا فیصلہ کیا ہے۔

تفصیلات کے مطابق سابق وزیراعظم عمران خان جلد پنجاب اور کے پی کے میں متاثرہ علاقوں کا دورہ کریں گے اور دورے کے دوران عمران خان سیلاب متاثرین سے ملاقات بھی کریں گے۔

ذرائع کا کہنا ہے کہ عمران خان نے پنجاب اور کے پی کے حکومت کو سیلاب متاثرین کی ہرممکن مدد کیلئے اقدامات کی ہدایت دی ہے۔

ذرائع نے بتایا کہ پی ٹی آئی چیئرمین عمران خان سیلاب متاثرہ علاقوں میں ریلیف سرگرمیوں پر اپ ڈیٹس لے رہے ہیں اور صوبائی حکومتوں کے ساتھ مسلسل رابطہ میں ہیں۔

یہ بھی پڑھیں:

سمندر پار پاکستانیوں کو سیلاب زدگان کی مدد کیلئے عطیہ کرنا چاہیئے، مریم اورنگزیب

مزید برآں چیئرمین عمران خان نے صوبائی حکومتوں کو سوات اور دیگر سیلاب متاثرہ علاقوں میں بھی بروقت امدادی سرگرمیوں کی ہدایت دی ہے۔

دوسری جانب بلوچستان میں مون سون کے چوتھے اسپیل نے ایک بار پھر شمال مشرقی اور وسط جنوب بلوچستان کے مکینوں کو اشک بار کردیا، کئی روز سے جاری موسلادھار بارش اور سیلابی صورتحال نےہر طرف تباہی مچادی، تاہم کراچی کوئٹہ شاہراہ 8 روز بعد عارضی طور پر بحال کردیا گیا ہے ۔

بلوچستان کےبیشتر بالائی علاقوں میں سیلابی صورتحال برقرار ہے، ہرنائی چاروں جانب سے سیلاب کے گھیرے میں ہے، پیر کی شام افغانستان سے آنے والے سیلابی ریلوں نے نوشکی، قلعہ عبداللّٰہ اور چاغی میں تباہی مچا دی،صرف نوشکی کے 7 دیہات ان سیلابی ریلوں میں ڈوب گئے، درجنوں مکانات کو نقصان پہنچایا ۔