عمران خان 29 مئی کو ملتان میں جلسے سے خطاب کریں گے۔شاہ محمود قریشی

 پاکستان تحریکِ انصاف کے نائب چیئرمین و سابق وزیرِ خارجہ مخدوم شاہ محمود قریشی نے کہا ہے کہ چیئرمین پی ٹی آئی عمران خان ملتان میں 29 مئی کے روز جلسۂ عام سے خطاب کریں گے۔

تفصیلات کے مطابق سابق وزیر اعظم عمران خان 29 مئی کو ملتان میں جلسے سے خطاب کریں گے۔ سابق وزیر خارجہ شاہ محمود قریشی نے اتوار کی شب ملتان میں عوامی اجتماع سے خطاب کے دوران کہا کہ بے نظیر بھٹو کا بیٹا مسلم لیگ (ن) کے سربراہ نواز شریف سے پنجاب میں 10نشستوں کی بھیک مانگنے لندن گیا۔

یہ بھی پڑھیں:

تحریکِ انصاف کا 26 اپریل کو الیکشن کمیشن دفاتر کے سامنے ملک گیر احتجاج کا اعلان

چیئرمین پی پی پی بلاول بھٹو زرداری پر تنقید کرتے ہوئے نائب چیئرمین پی ٹی آئی شاہ محمود قریشی نے کہا کہ 26 اپریل کے روز ملک بھر میں الیکشن کمیشن کے دفاتر کے باہر پر امن احتجاج ہوگا۔ قوم نے امپورٹڈ حکومت کو واضح طور پر مسترد کیا۔ آئندہ عام انتخابات میں عوامی ووٹ پی ٹی آئی کا ہوگا۔

خیال رہے کہ اس سے قبل سابق وزیر اعظم اور چیئرمین پی ٹی آئی عمران خان نے سپریم کورٹ میں غیر ملکی سازش پر مبنی دھمکی آمیز خط سے متعلق کھلی سماعت کا مطالبہ کرتے ہوئے دعویٰ کیا کہ تحریکِ انصاف کا مؤقف بالکل درست اور قومی سلامتی کمیٹی کا تازہ بیان ثابت کرتا ہے کہ امریکا نے پاکستان کے خلاف سازش کی۔

تحریکِ عدم اعتماد کے ذریعے وزارتِ عظمیٰ سے ہٹنے کے بعد پہلی بار پریس کانفرنس سے خطاب کرتے ہوئے چیئرمین پی ٹی آئی عمران خان نے کہا کہ قومی سلامتی کمیٹی اجلاس میں اس بات کی توثیق ہوئی کہ دھمکی آمیز خط حقیقت پر مبنی ہے اور امریکا میں پاکستان کے سابق سفیر کی امریکی عہدیدار ڈونلڈ لو سے ملاقات ہوئی تھی۔