خاتون جج کو دھمکانے کا کیس، عمران خان کی ضمانت میں 20ستمبر تک توسیع

سابق وزیر اعظم عمران خان خاتون جج کو دھمکانے کے کیس میں انسدادِ دہشت گردی عدالت میں پیش ہو گئے، عدالت نے چیئرمین پی ٹی آئی کی ضمانت میں 20 ستمبر تک توسیع کردی ہے۔

تفصیلات کے مطابق عمران خان کی طرف سے بابر اعوان  ایڈیشنل سیشن جج زیبا چوہدری کو دھمکانے کے کیس میں عبوری ضمانت کیلئے درخواست کی سماعت کیلئے عدالت میں پیش ہوئے۔ انہوں نے کہا کہ پولیس نے ہائیکورٹ کو گمراہ کیا تھا۔

یہ بھی پڑھیں:

پاکستان نے 2016 میں آئی ایم ایف کو خدا حافظ کہہ دیا تھا۔ اسحاق ڈار

عمران خان کے وکیل بابر اعوان نے کہا کہ عدالت کو غلط بتایا گیا کہ عمران خان تفتیش میں شامل نہیں جس پر معزز جج نے حکم دیا کہ تفتیشی افسر شفاف تحقیقات کرکے تفتیش پر پیشرفت سے آگہی دے۔ تفتیشی افسر کا کہنا تھا کہ عمران خان کو ہم نے 3 نوٹس بھیجے۔

انسدادِ دہشت گردی عدالت کے جج راجا جواد عباس نے مقدمے کی سماعت کے دوران ریمارکس دئیے کہ آپ تک بیان تو پہنچا لیکن آپ نے اسے ریکارڈ کا حصہ نہیں بنایا۔ اس سے تو پولیس کی بد نیتی ثابت ہوتی ہے۔ پراسیکیوٹر جے آئی ٹی تشکیل پر رہنمائی کریں۔

بعد ازاں عدالت نے سماعت 11 بجے تک ملتوی کرتے ہوئے عمران خان کو طلب کر لیا جس پر عمران خان انسدادِ دہشت گردی عدالت میں پیش ہوئے۔ دیگر اہم پی ٹی آئی رہنما اعظم سواتی، اسد عمر اور فیصل جاوید وغیرہ بھی عدالت میں موجود رہے۔ اسپیشل پراسیکیوٹر نے عدالت کو کیس پر آگہی دی۔

وکیل بابر اعوان کا کہنا تھا کہ عمران خان کیس میں ایک سے زائد بار جواب جمع کراچکے، کیا وہ پرائیویٹ ہے جو شامل نہیں کیا؟ بحث کیلئے تیار ہوں، نئے پراسیکیوٹر وقت لینا چاہیں تو لے سکتے ہیں۔ پولیس نے ضمنی میں بیان کو کیوں تحریر نہیں کیا؟ عمران خان کی گاڑی جوڈیشل کمپلیکس میں داخل کرنے کی اجازت دی جائے۔

عدالت نے استدعا منظور کر لی۔ خیال رہے کہ عدالت نے عمران خان کی عبوری ضمانت میں 12 ستمبر تک توسیع کرتے ہوئے فریقین کو حتمی دلائل دینے کی ہدایت کی تھی۔ آج سماعت کے حتمی مراحل میں عدالت نے عمران خان کی عبوری ضمانت میں 20 ستمبر تک توسیع کی منظوری دے دی۔