گوگل نیوز پر ہمیں فالو کریںاسلام آباد: چیئرمین پاکستان تحریک انصاف عمران خان نے آڈیولیکس کی تحقیقات کیلئے سپریم کورٹ سے رجوع کرلیا۔
عمران خان کی جانب سے سپریم کورٹ میں دائر درخواست میں آڈیو لیکس کی تحقیقات کے لیے جوڈیشل کمیشن یا جے آئی ٹی بنانے کی استدعا کی گئی ہے۔
درخواست میں موقف اختیار کیا گیا ہے کہ وزیراعظم ہاؤس اور آفس کی نگرانی، ڈیٹا ریکارڈنگ اور آڈیو لیکس کو غیر قانونی قرار دیا جائے، آڈیو لیکس کی تحقیقات کروا کر ذمہ داروں کو سزا دی جائے۔
چیئرمین پی ٹی آئی نے درخواست میں کہا ہے کہ حکومت اور متعلقہ اتھارٹیز کو مزید آڈیوز کی لیک روکنے کا حکم دیا جائے۔
ٹرانسجیڈر ایکٹ کے رولز حقائق کے برعکس ہیں، ایکٹ لاہور ہائیکورٹ میں چیلنج
سپریم کورٹ میں دائر درخواست میں وزارت داخلہ، وزارت دفاع، وزارت آئی ٹی اور وزارت اطلاعات کو فریق بنایا گیا ہے۔ اس کے علاوہ درخواست میں آئی بی، ایف آئی اے اور پیمرا کو بھی فریق بنایا گیا ہے۔
واضح رہے کہ وزیراعظم شہباز شریف نے بھی وفاقی کابینہ کی منظوری سے آڈیو لیکس کی تحقیقات ایف آئی اے سے کروانے کی منظوری دی تھی تاہم پاکستان تحریک انصاف نے ایف آئی اے کی تحقیقات کو مسترد کر دیا تھا۔
