مجھے علم نہیں تھا روس پہنچوں گا تو یوکرین پر حملہ ہوجائے گا۔عمران خان

اسلام آباد: سابق وزیر اعظم اور سربراہ تحریکِ انصاف عمران خان نے کہا ہے کہ مجھے علم نہیں تھا کہ روس پہنچوں گا تو یوکرین پر حملہ ہوجائے گا، روس، چین اور امریکا سے تعلقات پاکستان کے حق میں تھے۔

تفصیلات کے مطابق برطانوی ٹی وی (اسکائی نیوز) کو انٹرویو دیتے ہوئے چیئرمین تحریکِ انصاف عمران خان نے کہا کہ مجھے 22کروڑ عوام نے منتخب کرکے وزیر اعظم بنایا، پاکستان میری ذمہ داری تھا، عوام نے اسی کیلئے اقتدار دیا تھا۔ 

یہ بھی پڑھیں:

پی ٹی آئی نے اراکین کو اسپیکر کے سامنے پیش ہونے سے روک دیا

انٹرویو کے دوران عمران خان نے کہا کہ عالمی برادری کی غلطیاں ٹھیک کرنا ہماری ذمہ داری نہیں تھی۔ اسلام آباد میں لوگ جمع کرکے دوبارہ اقتدار حاصل کرنے کی خواہش نہیں۔ امریکی سازش سے لائی گئی حکومت میں60فیصد مجرم لوگ ہیں۔

سابق وزیر اعظم عمران خان نے کہا کہ عراق ہو، افغانستان یا پھر یوکرین، آپریشنز کی حمایت نہیں کرتا۔ ہماری خواہش ہے کہ الیکشن ہوں، فیصلہ عوام کو کرنا ہے چاہے جسے منتخب کریں۔ پاکستان میں ہمارے دور میں ریکارڈ زرِ مبادلہ پیدا ہوا۔

چیئرمین تحریکِ انصاف نے کہا کہ ہمارے دور میں ریکارڈ مقدار میں فصلیں پیدا ہوئیں، شرحِ نمو 6 فیصد رہی، صنعتیں ترقی کر رہی تھیں، محصولات ریکارڈ رہیں، کورونا کے دوران ہم دنیا کے 5 بہترین ممالک میں شامل تھے۔ دورۂ روس پہلے سے طے تھا۔

عمران خان نے کہا کہ ہم روس سے سستا تیل اور گندم خریدنے کے حق میں تھے۔ انتخابات کے خواہش مند عوام امپورٹڈ حکومت قبول نہیں کرینگے۔ عالمی برادری کو آزاد خارجہ پالیسی پر مداخلت سے باز رہنا ہوگا تاکہ پاکستان اپنے لوگوں کا خیال رکھ سکے۔

انہوں نے کہا کہ بھارت مسئلۂ کشمیر پر اقوامِ متحدہ کی قراردادوں کی مسلسل خلاف ورزی کرتا رہا ہے۔ کیا کسی نے کشمیریوں کے حق پر کوئی بات کی؟ ہزاروں کشمیری شہید ہوئے، بھارت کے اقدامات کی مذمت کسی نے کی؟ بھارت مغربی ممالک کا اتحادی ہے۔

سربراہ تحریکِ انصاف کا کہنا تھا کہ عالمی سطح پر پاکستان اور افغانستان کے متعلق پراپیگنڈا کیاجارہا ہے۔ ہم نے دہشت گردی کے خلاف جنگ میں 80 ہزار جانوں کی سب سے زیادہ قربانی دی۔ افغانستان میں ناکامی کو ہمارے سر تھوپا جارہا ہے۔