آئی ایم ایف پروگرام ہماری منزل نہیں، معاشی بحالی کا مرحلہ ہے۔وزیراعظم

اسلام آباد: وزیر اعظم شہباز شریف نے کہا ہے کہ آئی ایم ایف پروگرام کی بحالی پاکستان کی منزل نہیں بلکہ معاشی بحالی کا ایک مرحلہ ہے۔

سماجی رابطے کی ویب سائٹ ٹوئٹر پر اپنے پیغام میں وزیر اعظم نے کہا کہ آئی ایم ایف پروگرام کی بحالی معیشت کیلئے اہم ہے لیکن یہ ہماری منزل نہیں۔

یہ بھی پڑھیں:

کراچی میں ٹماٹر 480روپے فی کلو تک فروخت ہونے لگا

ٹوئٹر پیغام میں وزیر اعظم نے کہا کہ آئی ایم ایف پروگرام کی بحالی ایک مرحلہ ہے جو ملک کو معاشی بحالی کے راستے کی طرف لے کر جائے گی۔

وزیر اعظم شہباز شریف نے کہا کہ معاشی خود انحصاری کیلئے ہمیں دن رات محنت کرنا ہوگی۔ پاکستان کو معاشی زنجیروں کے چنگل سے نجات حاصل کرنا ہوگی۔

آئی ایم ایف پروگرام کی بحالی معیشت کے لئے اہم ہے لیکن یہ منزل نہیں، مرحلہ ہے جو ملک کو معاشی بحالی کے راستے کی طرف لے کر جائے گا۔ معاشی خود انحصاری کے لئے ہمیں دن رات محنت کرنا ہوگی۔ پاکستان کو معاشی زنجیروں کے چنگل سے نجات حاصل کرنا ہوگی جس کا واحد راستہ ڈھانچہ جاتی اصلاحات ہیں۔

— Shehbaz Sharif (@CMShehbaz) August 30, 2022

بین الاقوامی مالیاتی فنڈ (آئی ایم ایف) نے پاکستان کو 1 ارب 17 کروڑ ڈالر کی قسط جاری کرنے کی منظوری گزشتہ روز دی۔ وزیر اعظم کا کہنا ہے کہ معاشی بحالی کا واحد راستہ ڈھانچہ جاتی اصلاحات ہیں۔

خیال رہے کہ اس سے قبل وزیرِ خارجہ بلاول بھٹو زرداری نے آئی ایم ایف سے معاہدے میں مبینہ رکاوٹ ڈالنے پر تحریکِ انصاف کی قیادت کو غدار قرار دے دیا۔

 اپنے ایک بیان میں وزیرِ خارجہ بلاول بھٹو زرداری نے کہا کہ عمران خان آئی ایم ایف سے پاکستان کا معاہدہ سبوتاژ کرنا چاہتے تھے جبکہ بد ترین سیلاب کے وقت ایسی حرکت ملک اور عوام سے غداری ہے۔