گوگل نیوز پر ہمیں فالو کریںحماس نے خبردار کیا ہے کہ اگر اسرائیل نے زمینی راستے سے غزہ پر حملہ کرنے کا فیصلہ کیا تو سات اکتوبر کو جو کچھ ہوا وہ بہت ہلکا دکھائی دے گا۔
حماس کے رہنما اسامہ حمدان نے لبنان میں ایک پریس کانفرنس میں کہا کہ اسرائیل نے حماس کو جڑ سے اکھاڑ پھینکنے کے لیے غزہ پر زمینی حملے کی دھمکی دی ہے اور غزہ کی سرحدوں پر اپنی افواج کو متحرک کیا ہے۔
حماس کے رہنما نے انکشاف کیا کہ کئی بین الاقوامی اداروں نے حماس کے ساتھ غیر ملکی قیدیوں کے بارے میں بات کی ہے۔ غزہ پر اسرائیلی جارحیت ختم ہونے کے بعد ہی ہم اسرائیلی فوجی قیدیوں کے انجام کے بارے میں بات کریں گے۔ جب مناسب حالات ہوں گے تو ہم سویلین قیدیوں کی رہائی کے معاملے کو بھی دیکھیں گے۔
قبل ازیں اب تک حماس نے دو امریکی خواتین قیدیوں کو رہا کیا ہے، جو ماں بیٹی ہیں۔ اس سے کچھ دن پہلے بھی حماس نے دو خواتین قیدیوں کو رہا کیا تھا۔
اس سے پہلے اسرائیلی فوج نے غزہ میں حماس کے ٹھکانوں پر راکٹ لانچروں اور چھاپوں کا اعلان کیا ہے۔ جہاں تک القسام بریگیڈز کا تعلق ہے اس نے ہفتے کے روز تل ابیب پر راکٹ فائر کرنے کا اعلان کیا تھا۔ اس سے پہلے اسدود پر بھی کئی گھنٹے گولے برسائے گئے تھے۔
