گوگل نیوز پر ہمیں فالو کریںبین الاقوامی مارکیٹ میں سونے کی قیمتوں میں اتار چڑھاؤ کے بعد پیر کے روز پاکستان میں بھی سونے کے نرخوں میں اضافہ ریکارڈ کیا گیا۔
ملک بھر کی صرافہ مارکیٹوں میں فی تولہ سونا 800 روپے مہنگا ہو کر 3 لاکھ 50 ہزار 200 روپے کا ہو گیا۔
آل پاکستان جیمز اینڈ جیولرز ایسوسی ایشن کے مطابق 10 گرام سونے کی قیمت میں بھی 686 روپے کا اضافہ دیکھا گیا، جس کے بعد نیا ریٹ 3 لاکھ 240 روپے مقرر کیا گیا ہے۔
دوسری جانب، چاندی کی قیمت میں کوئی تبدیلی نہیں دیکھی گئی۔ فی تولہ چاندی بدستور 3,782 روپے پر برقرار ہے۔
واضح رہے کہ دو روز قبل یعنی ہفتے کو فی تولہ سونا 1,600 روپے سستا ہو گیا تھا، جس سے قیمت 3 لاکھ 49 ہزار 400 روپے تک آ گئی تھی۔ تاہم اب دوبارہ سے قیمتوں نے اوپر کا رخ اختیار کر لیا ہے۔
عالمی مارکیٹ میں بھی سونے کی قدر میں اضافہ ہوا ہے، جہاں فی اونس سونا 8 ڈالر مہنگا ہو کر 3,282 ڈالر (20 ڈالر پریمیئم سمیت) میں فروخت ہوا۔
