گوگل نیوز پر ہمیں فالو کریںسرگودھا میں ہولناک واقعہ پیش آیا ہے جس میں شوہر نے اولاد نہ ہونے پر پہلی بیوی کے ساتھ مل کر دوسری بیوی کو قتل کر ڈالا۔
ذرائع کے مطابق سرگودھا میں غریب خاندان پر قیامت ٹوٹ پڑی، محنت کش کی نوبیاہتا بیٹی کو سفاک شوہر نے اولاد نہ ہونے کا طعنہ دے کر قتل کر ڈالا۔ اس سفاکیت میں اس کا ساتھ کسی اور نے نہیں بلکہ اس کی پہلی بیوی نے یعنی ایک عورت نے ہی دیا۔
سامنے آنے والی اطلاعات کے مطابق گزشتہ سال قصبہ حسین شاہ کے باشندہ محنت کش ناظم نے اپنی 18 سالہ بیٹی عائشہ کی شادی ساہیوال سے تعلق رکھنے والے شاہد سے کی تھی، شاہد کی یہ دوسری شادی تھی۔
ذرائع نے بتایا کہ شاہد کو 12 سال سے پہلی اہلیہ شمائلہ سے کوئی اولاد نہ تھی، دوسری شادی کو ابھی ایک سال بھی نہیں گزرا تھا کہ شاہد نے اولاد نہ ہونے پر عائشہ کو پہلی اہلیہ کی مدد سے پھانسی لگا کر مار ڈالا۔
واقعے پر غم سے نڈھال اہل خانہ نے وزیراعلیٰ پنجاب اور اعلیٰ حکام سے انصاف کی اپیل کردی ہے۔ دوسری جانب پولیس کا کہنا ہے کہ واقعہ کا مقدمہ مقتولہ کے والد کی مدعیت میں درج کرلیا گیا ہے، ملزمان کو جلد گرفتار کرلیا جائے گا۔
