لندن نہیں جاؤں گا، ہمایوں سعید کے مہنگی ترین فلم بنانے کے دعوے پر تنقید

کراچی: ہمایوں سعید نے دعویٰ کرتے ہوئے کہا ہے کہ لندن نہیں جاؤں گا میری اب تک کی مہنگی ترین فلم ہے جس پر سوشل میڈیا صارفین نے شدید تنقید کی ہے۔

تفصیلات کے مطابق ہمایوں سعید کو اپنی آنے والی فلم لندن نہیں جاؤں گا پر سوشل میڈیا صارفین کے شدید ردِ عمل کا سامنا ہے تاہم یہ فلم پنجاب نہیں جاؤں گی کا دوسرا حصہ (سیکوئل) نہیں ہے۔

یہ بھی پڑھیں:

گلوکارہ ریحانہ کے ہاں پہلے بچے کی پیدائش، مداحوں کی مبارکباد

پاکستانی فلم لندن نہیں جاؤں گا کی کہانی معروف ڈرامہ نگار خلیل الرحمان قمر نے تحریر کی جبکہ فلم کی ہدایات معروف اداکار و ہدایتکار ندیم بیگ نے دیں۔ ہمایوں سعید کے مطابق یہ ان کی اب تک کی مہنگی ترین فلم ہے۔

فلم کی شوٹنگ برطانیہ اور ترکی سمیت مختلف ممالک میں کی گئی۔ ہمایوں سعید کا دعویٰ ہے کہ ان کی نئی فلم لندن نہیں جاؤں گا کا بجٹ گزشتہ پراجیکٹ جوانی پھر نہیں آنی 2 سے بھی زیادہ ہے جس پر عوام نے تنقید کی۔ 

لندن نہیں جاؤں گا کا بجٹ سب سے زیادہ ہونے کے دعوے نے سوشل میڈیا صارفین کی توجہ حاصل کر لی جن کا کہنا ہے کہ اگر یہ ہمایوں سعید کی سب سے مہنگی فلم بھی ہے تو ہم تھور اینڈ تھنڈر ضرور دیکھیں گے۔

ایک اور سوشل میڈیا صارف نے کہا کہ اگر لندن نہیں جاؤں گا اتنی مہنگی فلم ہے تو براہِ کرم اسے جاری نہ کریں۔ ایک اور صارف کا کہنا تھا کہ اگر فلم اتنی مہنگی ہے تو ہمایوں سعید فلم بینوں سے اتنی رقم وصول کیسے کریں گے؟