گوگل نیوز پر ہمیں فالو کریںمحکمہ موسمیات نے آئندہ چند روز کے موسم کے حوالے سے پیشگوئی جاری کرتے ہوئے کہا ہے کہ آج سے جمعرات تک ملک کے کئی حصوں میں موسمیاتی تبدیلیاں متوقع ہیں۔ اس دوران اسلام آباد، پنجاب، خیبر پختونخوا، گلگت بلتستان اور آزاد کشمیر میں بعض مقامات پر آندھی، گرج چمک کے ساتھ بارش کا امکان ظاہر کیا گیا ہے، جس سے درجہ حرارت میں معمولی کمی واقع ہو سکتی ہے۔
تاہم محکمہ موسمیات کا کہنا ہے کہ عید کی تعطیلات کے دوران یعنی جمعہ سے اتوار (7 تا 9 جون) تک زیادہ تر میدانی علاقے شدید گرمی اور خشک موسم کی لپیٹ میں رہیں گے۔ پنجاب، سندھ، بلوچستان اور جنوبی خیبر پختونخوا کے میدانی علاقوں میں دن کے اوقات میں درجہ حرارت غیر معمولی حد تک بڑھنے کا خدشہ ہے، جس کے باعث شہریوں کو احتیاطی تدابیر اختیار کرنے کی ہدایت کی گئی ہے۔
اس کے برعکس، بالائی علاقوں میں موسم نسبتاً خوشگوار رہنے کی توقع ہے۔ محکمہ موسمیات کے مطابق عید الاضحی کے دوران یعنی 7 سے 9 جون کے درمیان خیبر پختونخوا کے پہاڑی علاقوں خصوصاً دیر، سوات، چترال، کوہستان اور مانسہرہ میں کہیں کہیں بارش اور تیز ہواؤں کا امکان موجود ہے، جو ان علاقوں میں درجہ حرارت کو معتدل رکھ سکتے ہیں۔
عوام سے اپیل کی گئی ہے کہ وہ عید کے دوران سفر یا تفریحی مقامات کا رخ کرتے وقت موسم کی صورتحال سے باخبر رہیں اور گرمی سے بچاؤ کے لیے مناسب اقدامات کریں، بالخصوص بزرگوں، بچوں اور مریضوں کو دھوپ سے بچانے کی تلقین کی گئی ہے۔
