وزارت صحت نے سگریٹ کے اشتہارات اور اسپانسرشپ پر پابندی لگا دی

اسلام آباد: وزارت صحت نے سگریٹ کے اشتہارات اور اسپانسرشپ پر پابندی لگا دی ہے، سگریٹ کے اشتہارات، تمباکو انڈسٹری کی اسپانسر شپ اور انعامی اسکیموں پر پابندی کا نوٹیفکیشن جاری کر دیا گیا۔

وزارت صحت کے نوٹیفکیشن میں پوسٹرز، سینما گھروں اوراسکرینپر تمباکو نوشی کی مصنوعات کی تشہیر کو غیر قانونی قرار دیدیا ہے،نوٹیفکیشن کے مطابق سگریٹ بنانے والی کمپنیاں کسی دکان کے اندر یا باہر اشتہار نہیں لگا سکیں گی۔

پرنٹ اور الیکٹرونک میڈیا کے ذریعہ تمباکو کی مصنوعات کے تشہیر پر بھی پابندی عائد ہوگی۔

مزید پڑھیں: وزیراعظم کا سگریٹ کی غیرقانونی تجارت کے خلاف کریک ڈاؤن کاحکم

وزیراعظم کے معاون خصوصی ڈاکٹر ظفر مرزا کا کہنا ہے کہ کسی کو ذاتی ای میل یا ڈاک کے ذریعہ تمباکو نوشی کا اشتہار نہیں دیا جا سکے گا جبکہ کم عمر بچے بھی اب تمباکو مصنوعات کی اشتہاری مہم کا شکار نہیں ہوں گے۔

واضح رہے کہ ملک میں ہر سال ایک لاکھ 66 ہزار افراد تمباکو نوشی کے باعث مختلف بیماریوں سے ہلاک ہوتے ہیں، ملک میں تمباکو نوشی کی روک تھام کیلئے موثر قانون سازی حکومت کی ترجیحات میں شامل ہے، نئے قانون کے اطلاق کیلئے ہر ممکن حکمت عملی اپنائی جا رہی ہے۔