گوگل نیوز پر ہمیں فالو کریںحال ہی میں سوشل میڈیا پر صحافی عمران ریاض خان سے منسوب کچھ ویڈیوز وائرل ہو رہی ہیں جن کے حوالے سے دعویٰ کیا جا رہا ہے کہ پاکستان تحریک انصاف (پی ٹی آئی) کے بانی عمران خان کی جیل سے تصویر منظر عام پر آنے کی خوشی میں عمران ریاض رقص کر رہے ہیں۔
مصطفیٰ چوہدری جو ایک مزاحیہ اداکار ہیں، انہوں نے ویڈیو کے پھیلاؤ کو ہوا دی۔ انہوں نے ایک ویڈیو شیئر کرتے ہوئے لکھا “اگر عمران ریاض بھائی ڈانس کر رہے ہیں اور خود سے لطف اندوز ہو رہے ہیں تو کیا حرج ہے؟”
جس کے بعد دیکھتے ہی دیکھتے کئی ویڈیوز سوشل میڈیا پر سامنے آگئیں۔ ان ویڈیوز شئیر کرنے والوں میں صرف عمران ریاض کے مخالف ہی نہیں بلکہ حامی بھی شامل تھے۔
تاہم آج نیوز کے مطابق جب اس ویڈیو کو فیکٹ چیک کیا گیا تو معلوم ہوا کہ وائرل ہونے والی ویڈیوز صحافی عمران ریاض کی نہیں بلکہ ان سے مشابہت رکھنے والے ایک شخص کی ہیں جو بھارتی ہے۔
اس شخص کا نام ورن اروڑا ہے اور اس کی سفید داڑھی اور قد کی وجہ سے شبہ ہوتا ہے کہ وہ عمران ریاض ہے۔ اس شخص کا تعلق بھارت سے ہے اور یہ سوشل میڈیا پر ڈانس کی ویڈیوز بھی بناتا ہے۔
تاہم کچھ لوگوں نے سوشل میڈیا پلیٹ فارمز پر جھوٹے دعوؤں کی تشہیر کے لیے اس شخص کی ویڈیوز کا استعمال کیا ہے۔
