گوگل نیوز پر ہمیں فالو کریںبھارتی میڈیا نے پاکستانی اداکارہ ہانیہ عامر کی دولت اور کمائی سے متعلق تہلکہ خیز دعویٰ کیا ہے۔ بھارتی ویب سائٹ کے مطابق ہانیہ عامر کی مقبولیت نہ صرف پاکستان اور بھارت میں ہے بلکہ سری لنکا، افغانستان اور بنگلہ دیش میں بھی ان کے مداح موجود ہیں۔
چند روز قبل بھارتی گلوکار و اداکار دلجیت دوسانجھ نے ہانیہ عامر کے ہمراہ پنجابی فلم ‘سردار جی 3’ کا ٹریلر جاری کیا جس کے بعد بھارتی میڈیا نے ہانیہ کی زندگی پر باریک بینی سے نظر رکھنی شروع کر دی۔ کبھی بھارتی میڈیا ہانیہ کے خلاف زہر اگل رہا ہے تو کبھی ان کے ٹیلنٹ کے لیے انہیں داد دے رہا ہے۔
بھارتی انٹرٹینمنٹ ویب سائٹ بالی وڈ لائف نے اپنی رپورٹ میں پاکستانی اداکارہ کی دولت سے متعلق دعویٰ کیا ہے۔ ویب سائٹ کے مطابق ہانیہ عامر کا طرز زندگی انتہائی پرتعیش ہے، ان کا رہن سہن اور کپڑے مہنگے اور لاجواب ہوتے ہیں اور ان کے پاس عالیشان گھر اور گاڑیاں ہیں۔ ویب سائٹ کے مطابق ہانیہ کے پاس آوڈی کی ایک سے زائد مہنگی گاڑیاں ہیں جب کہ ان کی سالانہ کمائی بھی تقریباً 50 کروڑ روپے ہے۔
اس کے علاوہ بھارتی ویب سائٹ نے بتایا کہ ہانیہ عامر شوبز کے کام سے سالانہ 43 کروڑ روپے کماتی ہیں جب کہ اشتہارات اور برانڈز کی کمائی الگ ہوتی ہے۔ ہانیہ عامر ٹی وی اسکرین کی بھی مقبول ترین اداکارہ ہیں اور وہ ایک قسط میں کام کرنے کا معاوضہ 4 لاکھ روپے تک وصول کرتی ہیں۔
یہاں یہ بات بھی قابلِ ذکر ہے کہ بھارتی ویب سائٹ نے اپنی رپورٹ میں یہ نہیں بتایا کہ ہانیہ عامر نے پنجابی فلم ‘سردار جی 3’ میں کام کرنے کا کیا معاوضہ وصول کیا۔
واضح رہے کہ ‘سردار جی 3’ کو دنیا بھر میں 27 جون 2025 کو ریلیز کیا جا رہا ہے، تاہم بھارت میں اس کی ریلیز نہیں ہوگی۔
