عمران خان نے پی ٹی آئی کو نقصان پہنچانے کا اعتراف کر لیا۔حامد خان

اسلام آباد: سابق پی ٹی آئی رہنما اور نامور وکیل حامد خان نے کہا ہے کہ چیئرمین پی ٹی آئی عمران خان نے پی ٹی آئی کو نقصان پہنچانے کا اعتراف کیا ہے۔

تفصیلات کے مطابق نامور وکیل حامد خان نے نجی ٹی وی پروگرام کے دوران گفتگو کرتے ہوئے کہا کہ عمران خان نے ایسی غلطیوں کا اعتراف کیا جن سے پی ٹی آئی کو نقصان پہنچا۔ عمران خان نے کہا کہ انہوں نے جہانگیر ترین اور علیم خان کو غلط سمجھا۔

یہ بھی پڑھیں:

ضمنی انتخابات، پی ٹی آئی کے امیدواروں کو پارٹی ٹکٹس جاری 

اپنی عمران خان سے ملاقات کا احوال بیان کرتے ہوئے سابق پی ٹی آئی رہنما حامد خان نے کہا کہ چیئرمین تحریکِ انصاف عمران خان نے کہا کہ پارٹی کو میری غلطیوں کا خمیازہ بھگتنا پڑا۔ جسٹس قاضی فائز عیسیٰ کے معاملے پر بھی مجھے گمراہ کیا گیا۔

ملاقات کے متعلق حامد خان نے کہا کہ میرے پاس عمران خان کا پیغام شاہ محمود قریشی لائے۔ انہوں نے کہا کہ عمران خان نے تسلیم کیا کہ اسٹیبلشمنٹ کے سیاسی کردار کے خلاف میری (حامد خان کی) جدوجہد اور مؤقف درست ہے۔ میں نے عمران خان کو ماضی میں آگاہ کیا تھا۔

سابق پی ٹی آئی رہنما حامد خان نے کہا کہ میں نے جسٹس قاضی فائز عیسیٰ کے خلاف ریفرنس کو غلطی قرار دیا  کیونکہ معزز جج ایماندار رہے۔ عمران خان کے غصے میں آجانے کے باعث رابطہ منقطع ہوا۔ میں نے عمران خان کو ان کے اردگرد کچھ لوگوں سے خبردار بھی کیا تھا۔

حامد خان نے کہا کہ یہ لوگ بعض جماعتوں کو چھوڑ چکے تھے اور ان کے اسٹیبلشمنٹ سے روابط تھے۔ میں نے کہا کہ جب تک یہ لوگ عمران خان کے اردگرد ہیں، مشاورت نہیں ہوسکتی۔ مجھے پارٹی کا دفتر نہیں چاہئے۔ خواہش ہے کہ پی ٹی آئی اس ایجنڈے پر چلے جس کیلئے معرضِ وجود میں آئی تھی۔