حمزہ شہباز کوپنجاب اسمبلی میں اپوزیشن لیڈر بنانے کا فیصلہ

لاہور: پاکستان مسلم لیگ نواز ن نے مبینہ طور پر سابق وزیراعلیٰ حمزہ شہباز کو پنجاب اسمبلی میں اپوزیشن لیڈر بنانے کا فیصلہ کیا ہے۔

تفصیلات کے مطابق مسلم لیگ ن نے اتحادی جماعتوں سے مشاورت کے بعد حمزہ شہباز کو پنجاب اسمبلی میں قائد حزب اختلاف کے عہدے کے لیے میدان میں اتارنے کا فیصلہ کیا ہے۔

مسلم لیگ ن پنجاب اسمبلی میں دوسری بڑی جماعت ہے۔ سابق وزیراعلیٰ پنجاب اس وقت نجی دورے پر لندن میں ہیں۔

حمزہ شہباز سپریم کورٹ کے حکم پر صوبہ پنجاب کے وزیراعلیٰ کے عہدے سے ہٹائے جانے کے چند دن بعد نجی ایئرلائن کے ذریعے لندن روانہ ہوئے تھے۔

حمزہ شہباز کو اس وقت وزیراعلیٰ پنجاب کے عہدے سے ہٹا دیا گیا تھا جب سپریم کورٹ آف پاکستان نے پنجاب کے وزیراعلیٰ کے انتخاب میں ڈپٹی اسپیکر پنجاب اسمبلی دوست محمد مزاری کے فیصلے کو غیر قانونی قرار دیا تھا۔

مزید پڑھیں:صدرِ مملکت ڈاکٹر عارف علوی نے سینیٹ کا اجلاس کل طلب کر لیا

سپریم کورٹ کا کہنا تھا کہ ڈپٹی سپیکر کا فیصلہ غیر قانونی ہے۔ ڈپٹی اسپیکر کے فیصلے کا کوئی قانونی جواز نہیں ہے۔